Smuggled nga sakyanan

Usa sa gihingusgan karon sa atong kagamhanan mao ang kampanya batok sa palusot sa smuggled nga mga sakyanan. Duna nay daghang luxury cars nga pinalusot nga nasakpan sa mga awtoridad pero nagpadayon lang gihapon ang palusot.

Kalabot niini, may usa ka texter nga mipadangat nako’g kasayoran nga nagkanayon: “Good day, Sir. Diri sa Sacris road extension, ba. Naay mga bodega sa smuggled nga mga sakyanan. Nganong wala man na gi-raid? Maaksiyonan unta na, Sir.” -- 0906-9118666 (Sent: 10:36:52am -- Oct. 16, 2008)

Unsaon pag-raid kun walay kasayoran ang mga tinugyanan sa balaod mahitungod nianang giingon mong bodega sa smuggled nga sakyanan?

Hinuon, inigkapatik ning imong sumbong, manghinaot ta nga makabasa niini ang mga nahingtungdang ahensiya sa kagamhanan, partikular na ang PASG, aron masusi o ma-counter check nila ang imong sumbong, higalang texter. Ug hinaot unta nga ila kining maaksiyonan.

* * *

“Good day. Diha sa M.C. Briones duol sa COA dunay mga estambay diha mga batan-on pa. Naay mubo, tambok ug yagpis. Niwang ang usa. Mokalit lang sila pagkabyon sa pasaheroan nga jeep unya mokalit og bira sa bag sa pasahero. Pahinumdom lang ni para sa katawhan.” -- 0929-6476689 (Sent: 09:54:19am-- October 16, 2008)

Daghang salamat sa imong pahinumdom ug pahimangno, higalang texter. Hinaot unta nga pinaagi sa imong text, makabantay ang atong kaigsuonan batok nianang mga batan-ong manglabnihay diha sa M.C. Briones.

* * *

 “Pagbantay sad sa mga mangingilad nga naa diha dapit sa eskina Colon ug Leon Kilat. Tulo ni sila. Ang usa nila maoy unang moduol sa ilang biktimahon ug mangutana kun naa bay kaila (ang biktimahonon) nga naay dagkong sakyanan kay naa kuno siya’y kuhaon nga mga buwad. Tagaan daw ka og 5 boxes nga buwad. Unya moduol ang duha niya kakunsabo ug hagdon dayon ka nila pagduwa og baraha ug igarantiya ang imong alahas.” -- 0918-7195272 (Sent: 10:55:20am-- October 16, 2008)

Mao ni estilo sa modus operandi sa Budol-budol Gang! Pagbantay gyud kamo niini!

 (Sumbong ug reklamo? Text sa 0910-8105522).