Shabu sa Lacaron

Gikan sa naggamit sa cell. no. 0920-3756820: "Good day, Sir. Naa unta koy isumbong nimo. Puwerteng daghana sa shabu diri sa Lacaron, San Fernando. Puwerteng daghana ang mamalit diri og shabu. Abi nimo, Sir, ang shabu diri anha ra kuhaa sa dagat sa San Fernando. Magsakay ra man sa barge or bangka maong dili mailhan." -- (Sent: 12:26:53pm--September 12,2008)

Attention, San Fernando PNP. Palihog, Sir, i-counter check ninyo ang kasayoran nga gipaabot sa atong texter dinhi ning lindog. Dili nato ma-discount ang posibilidad nga tinuod kini busa labing maayo gyod nga inyo kining masusi.

Awhagon sab nako ang mga opisyal sa Lacaron sa pag-abag kanunay sa kapolisan sa kampanya batok ginadiling drugas. Paghimo mog linain nga pakisusi bahin sa impormasyon sa atong tipster kalabot sa pagpayuhot sa shabu diha sa Lacaron. Palihoka ninyo ang balaod. Palihoka ninyo ang mga tanod. Aksiyon!

* * *

"Sir, puyde ba kong moreklamo bahin sa akong suweldo? Nagtrabaho ko sa usa ka company diri sa may Fuente. Ang akong suweldo P267 ang adlaw unya 5 days ra. Dako man kaayo ang tax kay P200 man. Puyde ko moreklamo ini?" -- 0909-2834017 (Sent: 05:28:22pm--September 12, 2008)

Puyde kang moreklamo. Pero ang mas maayo una mong buhaton mao ang pagpangayo og explanation sa imong employer nganong ingon niana ka dako ang tax nga gikuha gikan sa imong suweldo.

* * *

Adunay duha ka matang sa fixer nga naglihok diha sa gawas sa buhatan sa LTO nga angay mailhan sa atong kaigsuonan.

Ang una mao ang fixer nga tinuod nga may direktang kontak sa sulod sa buhatan sa LTO maong makahimo gyod sa pagpalusot og dinaliang transaksiyon sa maong buhatan.

Ang ikaduha mao ang fixer nga walay klarong kontak o wala gyoy kontak sa LTO ug gusto lang mangilad sa mga aplikante.

Bisan hain niining duha ka matang sa fixer, angay gyod mong molikay. Dili maayo ang pagpanuborno.

* * *