EDITORYAL - Naunsa man ang BI-7 oy!

Si The Freeman columnist ug University of the Philippines professor Cherry Ballescas gibabagan sa taga Immigration sa pagsakay sa ayroplano padung Japan kay kuno anaa sa watchlist sa Bureau of Immigration si Cherry.

Human sa mga 20 minutos nga gitanggong si Cherry sa BI office, gipahibawo siya nga dili diay siya nga Cherry ang anaa sa watchlist.

Matud sa usa ka opisyal sa BI-7 nasayop diay sila. Lain diay nga Cherry ang naa sa ilang listahan.

Kini nagpakita sa ka inefficient ug kadanghag sa mga opisyal sa BI-7. Tungod lang kay naay Cherry sa ilang watchlist ilang “gisikop” si Prof. Cherry Ballescas. Wa ba diay apelyido ang mga tawo nga naa sa ilang watchlist?

Dakong sagpa kini sa ngalan sa BI dinhi sa Central Visayas.