Giawhag sa Ombudsman ang mga negosyante nga giingong gipangayoan og kwarta sa usa ka opisyal sa dakbayan sa Sugbu atol sa ASEAN Summit aron igasto pag-abi-abi sa mga langyaw nga sakop sa media paghatag kanila og dugang detalye aron mapadali ang imbistigasyon.
Si Deputy Ombudsman for the Visayas Pelagio Apostol nagkanayon nga mas madali alang kanila ang pakisusi kun dunay igong kasayuran nga ihatag ang mga negosyante nga giingong nitampo sa paghatag og pundo apan gidudahang gibulsa lang sa opisyal.
Si acting director Carla Narvios Tanco miingon nga ilang himuon ang fact-finding investigation kalabot niini. Sumala pa niya nga ila kining ilakip sa nagpadayon nilang pakisusi sa uban nga mga pasangil sa anomaliya sa Asean Summit.
Giawhag ni Tanco ang dunay kasayuran sa giingong pagbulsa sa usa ka opisyal sa dakbayan sa Sugbu sa mga hinabang nga makig-alayon sa ilang buhatan. Si Apostol mipasabot nga bisan kun gikan sa pribadong panudlanan ang maong pundo, apan mahulagway ni nga public funds sanglit gihatag man kini sa usa ka public official alang sa usa ka katuyoan.
Mas maayo tingali nga di modawat og limpiyo ang Ombudsman ug himuon ang ilang gimbuhaton. Dili trabaho sa mga negosyante ang paghungit og impormasyon ngadto sa Ombudsman.
Makasabot ko sa mga negosyante nga di moboluntaryo paghatag og kasayuran ngadto sa Ombudsman tungod kay nabalaka sab sila nga gukdon ang ilang patigayon. Angayang hinumduman sa Ombudsman nga gamhanan ang opisyal nga giingong naghimo niini busa mahimo niya ang pagpanggukod ni bisan kinsa nga masayrang nisuka.
Busa kun seryoso ang Ombudsman sa ilang gimbuhaton angayan nga sila maoy mangita sa ebidensiya ug di maghuwat nga kini maoy modu-ol.
* * *
Hangtud karon nagpabiling tensiyonado ang sitwasyon didto sa Tudela, Camotes tungod sa ka inutil sa Department of Interior and Local Government ug sa Commission on Elections.
Ang duha ka mga ahensiya nag-pinasahay kinsay angayang moresolbar sa panag-ilog nilang Mayor Rogelio Baquerfo ug Demetrio Granada sa pwesto. Tungod sa pagpasagad sa maong mga ahensiya gikabalak-an nga dunay dugo nga mobanaw.
Gahapon sa kaadlawon gisuwayan pagsulong ni Baquerfo ug sa iyang mga supporters ang munisipyo nga taud-taud na nga giukupahan ni Granada ug sa iyang mga supporters.
Apan wa molampus si Baquerfo pagkuha og balik sa iyang opisina tungod kay gipakgang siya sa mga dumadapig ni Granada nga nagbantay sa pultahan. Nahitabo ang kagubot resulta sa pagkabuak sa bildo nga pultahan sa munisipyo.
Napugos hinuon sa pag-atras ang grupo ni Baquerfo, apan unsa man kahay posibleng nahitabo og wa moatras? Posible dunay mga nabun-og o ba kaha namatay gyud.
Samtang miingon ang DILG nga si Baquerfo maoy ilang giila nga mayor tungod kay wa pay writ of execution ang korte sa decision niini nga si Granada maoy tinud-anay nga mananaog apan wa sila’y gihimo sa pag-una-una niini og lingkod.
Kun illegal man kaha ang pag-asumir ni Granada nganong gipasagdan man sa DILG nga yak-an ni Granada ug sa iyang mga dumadapig ang munisipyo?
Ang kainutil sa DILG miresulta ni sa pagkaangin sa mga molupyo nga wa na mahatagi og maayong serbisyo ingon man sa mga kawani nga naapiki ang sweldo.