Pabaya

Daghang Rural Bank lukop nasud ang nagdeklarar og Bank Holiday sa milabay’ng duha ka semana. Kini ang hinungdan nga ngi-ob ang Pasko sa mga depositors ning mga bangkoha. Ang mga depositors nakalitan sa gihimo sa maong mga rural banks tungod kay gitunong gayod kini ning buwan sa Disyembre diin gikinahanglan gayod nila ang salapi.

Ang mga Bank holiday nga gideklarar sa mga Rural Banks sinyales na ba kini nga ang Pilipinas apektado na sa kalibutanong krisis sa panalapi sa tibuok kalibotan nga nagsugod didto sa Amerika ug Uropa? Ingon ang gobiyerno dili apan ang abogado sa nag-bank holiday nga bangko miingon nga Oo. Kun si kinsa man ang nagsulti nila sa tinuod Ginoo ra ang nasayod, ang di nila ikalimod mao ang kadaghan sa ilang mga depositors nga nakalitan nga di na makakuha sa ilang salapi nga gipatubo ug kun makakuha man seguro dugay pa ug kuwangan ilabi na nga 250,000 ka pesos lamang ang ibayad sa Philippine Deposit Insurance Corp. ngadto sa matag depositor.

Sa kalit nga pagpanira sa pipila ka mga Rural Banks lukop nasud di ba nato mabasol o dili ba mabasol sa mga depositors ang Bangko Sentral tungod sa kapakyas niini pagtan-aw sa panalapi sa maong mga bangko aron mapanalipdan ang mga depositors? Di ba iya man nga trabaho sa Bangko Sentral ang pagtan-aw sa kahimtang sa mga bangko aron mapanalipdan ang publiko ug mga depositors niadtong mga bangko nga mapahimuslanon ug mangingilad? Nganong wa man mabantayi sa Bangko Sentral ang mga Rural Banks nga nagsira sa ilang operasyon tungod kay wa nay salapi? Diin man ang mga tawo sa atong Bangko Sentral, nangatulog sa pansitan?

Ang kalit nga pagpanira ning pipila ka mga Rural Banks usa kini ka pagpahigmata sa atong Bangko Sentral ug sa iyang mga gingsakpan aron dili na kini mahitabo pag-usab sa umaabot nga panahon. Pahigmata usab kini ngadto sa mga gustong magtigom ug adunay mga salapi nga usisahon pagmaayo ang financial records ug integridad sa bangko nga depositohan aron makalikay sa susamang hitabo.

* * *

Makapanghambog na usab karon ang Bureau of Customs dinhi sa Sugbu ubos sa pagpango ni District Collector Ricardo Belmonte tungod kay wa lang nila makuha ang target collection niining tuiga, misobra pa. Sa target collection nga 5 bilyones ka pesos alang ning tuiga, ang Port of Cebu nakakolekta og 5.013,454 bilyones ka pesos sukad kaniadtong buwan sa Enero hangtod sa buwan sa Nobiyembre. Kining maong collection dako na kaayo kini og ikatampo ngadto sa panudlanan sa atong gobiyerno. Tungod niini atong pahalipayan ang Big Five sa nahisgutang buhatan nga sila si District Collector Ricardo Belmonte, Deputy District Collector for Operation Atty. Paul Alcazaren, Chief of Staff Dick Carino, Chief for Assessment Carlos Corsiga ug Assistant Chief for Assessment Florante Ricarte.