Ayoha g'yod pagtrabaho ha

Gitakda nga bungkagon karong buntag sa mga sakop sa Squatters Prevention Encroachment Elimination Division (SPEED) ang mga tindahan sa Sto. Nino vendors diha sa eskena D. Jakosalem ug Osmeña Boulevard.

Maayo. Apan ang awhag lang nako ni acting Mayor Mike Rama mao nga siguroon nga walay makabentaha. Ang executive assistant ni Rama nga si Ryan Go maoy gitahasan pagpatuman sa iyang kamandoan.

Ang ako lang nga dili unta madala si Go sa bulada nilang Basan Amora, ang presidente sa maong grupo sa mga vendors. Angay’ng masayran ni Ryan Go nga kini si Basan duna nay tindahan didto sa kongkreto nga stalls nga gihimo kaniadto sa Young Builders.

Tan-aw nako mora’g kuwang og kasayuran niini si Go mao nga mas labing maayo nga magpakisayod ka sa detalyi gikan sa mga suheto.

Dili man god maayo nga dunay mamentaha. Sayon ra man god kaayo alang ni Basan ang pag-ingon nga wala siya’y tindahan didto sa concrete stalls mao nga mahimo siya nga makapaninda sa eskena.

Kuhai og pamahayag ang ubang tindera nga anaa nag-ukopar sa stalls aron makuha g’yod nimo ang tinuod. Bisan ang manghud ni Basan nga si Merlinda “Inday” Batiller makasulti niini.

Ang amahan ni Basan nga si Constantino “Tatay” Amora makamatuod sab. Ang ako lang g’yod unta nga hangyo ni Bay Basan mao nga isip presidente, dili ka mamentaha.

Gihatagan ka na og maayong kahimtang sa Sto. Niño mao nga nakaangkon ka og mga sakyanan, ingon man ubang negosyo. Ayaw na pamentaha sa imong mga sakop.

* * *

Sa akong tan-aw, ang mga tindera og imahen dili usab maleksyon kun human masakmit ang ilang baligya, dunay opisyal sa City Hall nga magdupa-dupa aron ipauli ang mga butang masakmit.

Kining maong mga tawo maoy nagdala og tigaw. Duna gani’y uban niini nga dili na ko ganahan nga motagad tungod kay walay pulos nga pagka kawani sa kagamhanan.

Mga tawo nga talawan mopatuman sa kamandoan sa ilang labaw. Usik lang ang pagbaton nato og daghang mga bata-bata nga pirming mag-uban-uban kun asa ka molakaw kun mahadlok ka gihapon.

Kun ibutang nato nga wala ka mahadlok, unsay buot ipasabot? Kini god nga pagpanarbaho sa kagamhanan gitumong man g’yod unta aron pagserbisyo, dili kay aron makakwarta.

* * *

Nalipay ko kay ang akong higala nga si Koronel Rex Derilo mitinuod sa usa ka security agency nga miisyu og armas nga walay lisensya ngadto sa iyang gwardya.

Kun ako maoy tahasan sa pag-imbistigar sa ingon niini nga isyu, daghan g’yong mga tag-iya og ahensya sa mga gwardya ang manghilak.

Ang ilang mga armas gipabuhat ra sa Danao ug ang serial numbers gikopya sa ilang daan nga lisensyadong armas. Mao na nga ang mga paltik nga armas sa mga gwardya dili mawagtang.

Mailhan baya na kun tandion ang stencil sa orihinal nga armas nga gipalisensyahan. Apan kun ang mga polis nga gitugyanan sa maong trabaho, makigkonsabo ra usab aron makakwarta, wala gihapo’y mahimo.

Sa laktud, nagkinahanglan kita og matinud-anon nga mga opisyal sa kapolisan nga mohimo og sensiro nga kampanya ug atong lauman si Koronel Derilo nga mohimo niini.