Gikan sa cell. no. 0923-8331811: "Sir, maayong adlaw. Ang akong concern bahin diri sa mga estudyante sa high school sa Zapatera Night High School. Dili man sila manulod sa ilang klase. Ari man sila mag-estambay dapit sa maong balay diri sa Creekside. Mag-inom sila sa usa ka tindahan." -- (Sent: 05:45:25 pm--September 16, 2008)
Atong awhagon ang mga ginikanan nga may gipa-eskuylang anak sa Zapatera Night High School sa pagsubay sa binuhatan sa ilang anak. Basin nagmata lang silag morning ug usa diay ang ilang anak sa dili mosulod sa klase kay mag-estambay ug mag-inom lang sa usa ka tindahan.
Alang sa nahisgotang mga estudyante, labing maayong hunongon na ninyo kanang inyong tinonto. Luoy intawon ang inyong mga ginikanan nga naglaom nga nagtarong mo sa inyong pag-eskuyla ug walay kasayoran nga nagpunay lang diay og estambay.
Pasalamatan sab nako ang akong texter sa iyang pagpakabana sa kaugmaon sa mga estudyante.
* * *
"Good day, Sir. Naay nag-piggery diri sa among silingan. Baho kaayo ang hugaw sa baboy. Moreklamo unta mi bahin ini. Unsay angay namong buhaton? Thanks." -- 0920-7535160 (Sent: 07:55:34pm--Sept. 16, 2008)
Akong sugyot nga i-refer una kanang maong problema ngadto sa barangay aron ila kanang masusi.
Kun wala ikaw'y makitang alibyo, ipaabot ang imong reklamo ngadto sa health division sa LGU diha sa inyong siyudad o munisipalidad.
* * *
Kun suhiron gyud pag-ayo, daghang rice retailers sa NFA nga wala magtuman sa mga lagda. Ang uban mipaburot pag-ayo sa ilang ginansiya sa pagbaligya sa maong bugas.
Didto sa Bohol, daghan kaayo ang wala motuman sa mga lagda. Partikular na sa lungsod sa Mabini ug Ubay. Ambot kun may kakugi ba kaha ang taga NFA sa pagsubay niini.
(Sumbong ug reklamo? Text sa 0910-8105522).