Misa de Gallo

Ang Christmas sa Pilipinas, usa sa duha ka predominantly catholic countries in Asia maoy usa sa pinakadakong holiday sa atong kalindaryo. Ang nasud nailhan sa kalibutan sa kataas sa pagsaulog niini sa Pasko diin ang mga christmas songs imo nang mabati sa bulan pa lamang sa Septiyembre ug molungtad hangtod sa adlaw sa epiphany.

Kaganihang kaadlawon maoy sugod sa siyam ka adlaw nga novena sa misa de gallo unya sama sa atong gipaabot nagsugwak ang mga tawo nga mitambong niini. Ang misa de gallo mao ang pinakamahinungdanon kaayong christmas tradition sa mga Pinoy.

Kining siyam ka adlaw nga misa sa kaadlawon gikonsiderar usab kini nga novena sa mga katoliko diin gihimo niini ang ilang pribado o publikong devotion aron maangkon ang mga gipangayong grasya.

Sa mga parokya nagkalain-lain ang oras sa pagsugod sa misa. Adunay magsugod sa ilang misa nga mas sayo pa sa alas kuwatro sa kaadlawon samtang ang uban sa alas kuwatro gayod.

Ang pagtambong sa misa sa kaadlawon sulod sa siyam ka sunod-sunod nga adlaw maoy pagpakita sa mga manimbahay sa ilang devotion ug pagtuo ingon man pagpalig-on sa ilang gipangandaman nga pagkatawo sa atong Manunubos. Kanatong mga Pinoy, ang pagkompleto sa siyam ka adlaw nga novena nagpasabot nga ihatag sa Ginoo ang atong mga gipangayo.

Kaniadto sa bata pa ko ang di gyod nako makalimtan sa misa de gallo mao ang painit inig human sa misa kay didto sa among lungsod sa Bien Unido ilabi na sa simbahan ni Senyor Santiago gi-grupo ang mga pamilya nga maoy mopreparar sa painit nga libre sulod sa siyam ka adlaw mao nga bisag tugnaw mokuyog gyod ko sa ako lola. Sa probinsiya ugod libre ang painit paghuman sa misa de gallo dili pariha dinhi sa siyudad nga makapainit ka lang kun aduna kay kuwarta.

* * *

Morag ngitngit ang Pasko sa mga depositors sa mga bangkong gipanag-iya sa Legacy Group of Companies nga nag-una-una og holiday kay nagdeklarar og Bank Holiday. Matud pa sa tagdumala ning maong mga bangko nga nag-bank holiday sila tungod sa kadaghan sa nag-withdraw sa ilang mga gipangdeposito. Gisuwayan pa unta nila sa pagtapak ang kadaghan sa withdrawal pinaagi sa pagdali-dali pagpangotang sa Bangko Sentral pero wa na kini madala tungod sa kalangan sa proseso.

Ang bangko nga gipanag-iya sa Legacy Group of Companies nanglansis ngadto sa ilang mga depositors nga naglaom nga adunay kahayag ang ilang Pasko human nila pasaligi og dagkong interest sa ilang mga deposits. Ang emergency loan nga gihimo sa maong mga bangko depensa lamang sa ilang paglimbong ngadto sa ilang mga depositors. Way bangko dinhi sa Pilipinas nga wa masayod sa kadaghang withdrawals sa buwan sa Disyembre busa gipangandaman na unta kini nila kun wa pa sila’y plano nga ilaron ang ilang mga depositors.