May drug users sa Mohon?

"Good day, Sir. Ako lang ireklamo kining mga drug user diri sa among barangay sa ubos Mohon. Anha maghithit kilid sa simbahan. Wala gyod makabadlong ang mga tanod diri." -- 0909-9738471 (Sent: 07:11:19 pm--October 14, 2008)

Atong sangpiton ang atensiyon sa mga brgy. opisyal sa Mohon. Palihoka ninyo ang inyong mga tanod. Ipasubay nila kining gitaho sa atong texter nga naay tiggamitan og ginadiling drugas nga anha gyod maghithit sa kilid sa simbahan aron masuta kon unsa kini ka tinuod.

Aksiyoni!

* * *

"Good day. Moreklamo ko anang dispatser diha sa Foodland. Isog kaayo. Dili ra ba mosugot kon hatagan og P3 kay ang gusto niya P10. Unya manghulga pa gyod. Kanang maong dispatser mao si Aldren. Bagsik kaayo." -- 0919-5098476 (Sent: 10:12:35 pm--October 14, 2008)

Ireklamo ninyo kanang maong dispatser ngadto sa barangay diin nahisakop kanang dapit diin nangdipats kana si Aldrin.

Puyde sab nga i-diretso ninyog padangat ang inyong reklamo ngadto sa mga polis. Extortion na kanang gibuhat sa maong dispatser. Wala siyay katungod pagbungat og kantidad nga iyang pangayoon gikan sa mga driver og public utility vehicles kay illegal kanang iyang gihimo.

Baga sad og nawong kanang tawhana. Morag higasbot!

* * *

"Sir, diri sa A. Lopez naay drug lord nga dagko kaayog tindahan. Lain ang gipadala aron dili halata. Daghan nang mga batan-on nga nangabuang sa drugas. Mga ginikanan naglibog na unsaon pagpakgang." -- 0920-74231173 (Sent: 09:35:55 pm--October 15, 2008)

Kon gusto mong mapakgang ang kalihokan sa ginadiling drugas diha sa inyong dapit, mas maayong magpadangat mong reklamo ngadto sa kapolisan. Tug-ani sila kon kinsa kanang gikatahapan ninyong drug lord diha sa A. Lopez aron ila kanang mapanid-an.

Puyde sab nga modangop mo sa Dangerous Drugs Boards (DDB). Mihingusog man ang DDB sa kampanya batok sa ginadiling drugas.

 (Sumbong ug reklamo? Text sa 0910-8105522).