“Kapait sa Cordova kay naghitak ang shabu. Wala gyud ni masumpo kay ang nagbaligya pulos man bata-bata og politiko. Sa brgy. Camolinas morag nagbaligyag isda ang mga tigpayuhot. Grabe kaayo. Mao pod sa Cogon, Bangbang ug Day-as. Asa na man ang taga PDEA, uy.” -- 0920-5514307 (Sent:01:00:02pm-- July 1, 2008)
Labing maayong ma-counter check sa kapolisan sa Cordova kining gitaho sa usa nato ka texter. Kun tinuod kining iyang alegasyon, makaingon ta nga dayag na kaayo ang pagpayuhot og shabu sa maong dapit. Ingon gani sa identified na sa mga molupyo ang mga tigpayuhot.
Angay gyud kining aksiyonan sa proper authorities!
* * *
“Good AM. Diri sa may Burgos naay dispatser nga nasuko sa driver. Gidapog niya ang driver. Gibaharan pa nga iyang pusposan og bato. Badlongon unta na sila. Nanginabuhi pod baya ang driver.” -- 0929-3696822 (Sent: 08:07:49am-- JUly 1, 2008)
Mas maayo unta kadto kun nagpa-blotter ang driver nga gidapog o gipasakitan sa maong dispatser. Iapil pod sa blotter ang pagbahad sa dispatser nga iyang pusposan og bato ang driver.
Nagdasa lang ning mga dispatser kay wala man ing nakabadlong nila. Maayo untag mabadlong ni sila sa tanod o polis.
* * *
“Sir, good PM. Wa man lagi matay-og ning mamaligyaay og shabu diri dapit sa may Basubas Comp. Hinay gyod diay ang police Mandaue.” -- 0909-8289247 (Sent: 07:53:08pm-- July 1, 2008)
Manghinaot ta nga inigkapatik ning imong text nasumpo na ang payuhot og shabu diha sa dapit nga imong gihisgotan.
Ato unang hatagan og lugway ang atong pailob kun ugaling dili maaksiyonan dayon sa kapolisan ang mga illegal nga kalihokan diha sa Mandaue. Nakasabot ta nga daghan sab kaayo sila’g giatiman.
Sa samang higayon, manghinaot sab ta nga maaksiyonan nila kining gisumbong sa atong texter. Mas maayo unta kon ila kining ma-counter check. Ug salamat daan.
* * *
(Sumbong ug reklamo? Text sa 0910-8105522).