Nakalimot ang atong mga tinugyanan sa Kongreso nga anaa sila diha sa ilang nahimutangan karon, dili gumikan sa Malacañang, kondili gumikan sa katawhan. Sa ato pa, kun maghisgut tag utang kabubut-on, nakautang silag kabubut-on sa lungsod ug dili sa Malacañang.
Maoy hinungdan nga kun dunay mga lungsudnong mga isyo, kinahanglan ang interes sa katawhan maoy ilang panalipdan.
Usa sa dakung isyo nga giatubang karon sa atong nasud, mao grabe nga korupsiyon. Makauuwaw kaayo, apan mora mag way nauwaw sa atong mga lider. Unsa man ni Dro, pabagaay na lang tas atong nawong ini?
Karon, tapus nila ibasura ang laing complaint sa impeachment, kay kono kulang sa substance, bisag iksakto unta sa form, mao na karoy ilang gikalingawan ang Cha-Cha, Con-Ass, No-El, ug ang pag-lugway ilang mga term.
Mangutana ta: Mao ba ni ang gusto sa lungsod? Mao ba ni ang gipangandoy sa mga tawo nga mibotar kanila? Mao ba ni ang kabubut-on sa katawhan? O mao ba ni ang gusto sa Malacañang?
Kang kinsa man diay nga gusto ang ilang silbihan? Tubaga kono ni Dro!
Ang gihangyo ni kanhi Speaker Joe de Venecia sa iyang mga kauban sa House of Representatives, mao ra gyud ang pagpaminaw sa tagsatagsa nila ka konsiyensiya. Lisud ba god ni? Nakalimot si Speaker Joe nga kining konsiyensiya sayon kaayong supakon, ug dali rang pildihon ug mahimong dili paminawon, i-ignore lang.
Mao nga in government service, di maayong maghisgot tag konsiyensiya. Di ba Dro? Ipadaplin lang una ni nato, kay karong panahona, morag irrelevant na ang tanlag. Obsolete na, passé na!
Mangutana tag usab: Mr Congressman, kang kinsa mang gusto ang Cha-Cha, ang No-El, ang Con-Ass, ug ang pag-extend sa inyong mga term? Imo rang gusto? Gusto sa Malacañang? O gustong Pedro?
Yuna pa, nganong hadlok man mo sa impeachment? Di mo gustong ma-cleared ang Presidente? Di mo gustong mamatud-an nga wala siyay kasal-anan?