Fake nga decision sa Korte Suprema?

Sa miaging semana maoy nahimong unod sa akong lindog ang kompiyansa sa atong hudikatora nga natandog na sa kagaw sa corruption ug gihinay-hinayan na sa pagkutkot sa bakukang sa influencia. Gisaad ko usab kaninyo nga atong tukion karon ang reklamo ni Professor Flaviano Manalo kinsa midangop sa akong tulomanon sa radyo sa DySS pipila na ka semana ang nakalabay tungod sa ilang giingon nga kadudahang hukom sa atong labaw’ng hukmanan. Si Professor Manalo mao ang assistant secretary sa University of San Agustin Employees Union nga nakabasi didto sa dakbayan sa Ilo-ilo. Ang ilang union sakop usab kini sa Federation of Free Workers. Aron inyong masubay ania ang tipik sa unod sa iyang reklamo.

Kaniadtong Septiyembre 19, 2003, tungod kay wa magkasabot ang ilang union ug management sa University of San Agustin sa economic provision sa ilang Collective Bargaining Agreement, ilang gipasiugdahan ang napulo ka oras nga strike. Tungod sa strike dali nga mipatonga ang sekretaryo sa Departamento sa Pamuo kinsa mihatag og pabor sa ilang reklamo. Ang sekretaryo mideklarar nga legal ang strike ug mimando sa tagdumala sa tunghaan sa paghatag sa mga benepisyo sa mga nagprotestang empleyado.

Apan ang tagdumala sa tunghaan midangop sa Court of Appeals diin gibaliktad ang naunang hukom sa sekretaryo sa pamuo. Ang Court of Appeals miingon nga illegal ang strike ug mimando sa pagpaabot ngadto sa voluntary arbitrations sa gikasungi-an nga benipisyo.

Pagka Abril 5, 2005, gitangtang sa tagdumala sa tunghaan ang tanang mga opisyal sa Union hinungdan nga mipahigayon na usab sila og laing strike. Ila usab nga gipaabot ngadto sa Korte Suprema nianang pagka Oktubre 2005 ang hukom sa Court of Appeals nga sa ilang tan-aw miabuso sa discretion niini.

Abril 1, 2006 mikatap ang text messages sa ilang tunghaan nga mipagawas na og hukom ang Korte Suprema sa ilang kaso G.R. No. 169632 ug mabasa kini sa website. Pagkasunod adlaw mipatawag dayon sa mga sakop sa medya ang tagdumala sa tunghaan sa pagpahibalo sa hukom sa Korte Suprema apan wala kini gikapakitang kopya sa hukom.

Abril 24, 2006 nadawat sa union ang usa ka envelope nga adunay silyo sa Supreme Court en banc apan photocopied gikan sa sinuwat sa kamot sa usa ka bond paper ug gi-scotch taped sa atubangang bahin sa envelope ang gipadad-an niini. Sinuwat usab sa kamot ang docket number niini ug gipadala nianang pagka Miyerkules Santo.

Sa unang pahina sa hukom sayop ang spelling sa buwan nga Marso nga gisapawan og marka sa electric typewriter nga adunay pirma “mlvillarama”. Sa pakisusing gihimo nasuta nga si mlvillarama mao ang clerk of court sa en banc nga si Atty. Ma. Luisa Villarama. Ang kaso nakadistino sa second division sa Korte Suprema nga ang clerk of court mao si Atty. Ludichi Nunag.

Sa maong hukom wa na magkadimao ang pipila ka facts sa kaso. Wa usab tukia niini ang legalidad sa termination sa mga nagprotestang empleyado nga usa sa ilang gidangop ngadto sa Korte Suprema. Sumpayan pa