Pag-ayo sa guba

DISYEMBRE 7, 2008: Ikaduhang Domingo sa Adbiyento

Mga Pagbasa:  en. 3:9-15,20/Ef. 1:3-6,11,12/Lk. 26-38

Ning Ikaduhang Domingo sa Adbiyento nigawas na pud ang mahinungdanong personahe ni Juan Magbubunyag. Gitudlo niya ang dakong kamapuslanon sa Pagbag-o sa Kaugalingon ug Pagbiya sa sala ingon nga hingpit nga paagi sa pagdawat ug pagpahari sa Mesiyas. Ang Pagbag-o nagpasabot og pagbiya sa naandang pagkinabuhi sa sala tungod kay nakita sa tawo ang mas bililhong kalambigitan sa maong bag-ong kinabuhi diha sa pagkab-ot sa iyang kahingpitan ingon nga tawo.

Sa matag higayon nga moabot ang Pasko sa Pagkatawo sa Ginoo kitang mga tawo ang nahimong maghunahuna lamang sa mga aksidental nga bahin sa maong pangilin. Ang mga hikay, pagbinayloay og mga gasa, mga bonuses, mga dekorasyon ug uban pa mao dayon ang atong hunahunaon. Ug kon mohimo gani kita og mga resolusyon sa kabag-ohan, nahimo lamang kining mga resolusyon nga walay katumanan.

Dili paigo ang pagpangayo og pasaylo tungod sa kadaut nga nahimo sa tawo kondili mas haom nga ato kining pagabayran sa tukmang pag-ayo o pag-alim sa guba nga atong nahimo.Hinuon, dili kini dayon mahitabo kondili moagi una kini og proseso aron mahimong mas integral ang atong pagtan-aw sa kinabuhing dili hingpit apan pagahingpiton pa sa pagdagan sa panahon.