Raket sa LTFRB

Mao ni giingon nga better late than later: Ang LTFRB nimando na nga laslasan og P0.50 ang minimum nga plitehan sa jeepneys ug buses ug tangtangon ang P10 nga patong sa flag down rate sa taxis. Uwahi nang daan ang kamandoan. Apan unya pa gyod isugod pagpatuman sa Disyembre 15.

Ang hukom sa LTFRB nisukwahi sa nahaunang pahibawo sa iyang tsirman, si Heneral Thompson Lantion, nga ang us-os sa plitehan ipatuman unya sa Lunes, Disyembre 8. Wa gyod diay magdali ang LTFRB paghatag og alibyo sa mga pasahero. Nga maoy nagsangkiig sa di makiangayon nga taas nga plitehan bisan hagbay rang nitibugsok ang presyo sa lana sa merkadong kalibotan.

* * *

Mapagarbuhong gipahibawo sa kadagkoan sa LTFRB nga duna nay mga drayber ug operators sa jeepneys ug buses nga boluntaryo nga nipaubos sa plitehan ug taxi drivers ug operators nga wa na mangolekta sa patong nga P10. Sa way paghunahuna nga ang kamanggihatagon sa drivers ug operators dakong sagpa sa ilang buhatan.

Kay ang labing dakong katuyoan sa pagtukod sa LTFRB mao ang pagduma sa industriya sa transportasyon. Nga naglakip sa pagtakda sa makiangayon nga plitehan sa mga sakyanan sa yuta-nga maabot sa mga pasahero apan makapalambo sab sa transport groups. Nga ang drivers ug operators mas una nga nakalaslas sa ilang plitehan nagmatuod nga ang LTFRB kun wa man magmika hingpit nga nagpabaya sa labing batakan nilang gimbuhaton.

* * *

O di kamao sa ilang gimbuhaton. Di ikapasigarbo ang nangalisbo nga kasaysayan sa buhatan. Apan ang pamunoan ni Lantion nameligro nga maoy ilhon sa kasaysayan nga labing banga ug labing taphaw. Ang ilang kalangayan ug nag-usab-usab nga mga pahibawo nagtimaan sa ilang kayagaw.

Klaro man gud nga ang LTFRB wa makapusta sa katawhan. Natudlo sa katungdanan di tungod sa ilang katakos. Kun dili tungod sa kasipsip sa ilang mga padrino. Maong dali rang paliku-likuon suma sa kapritso sa ilang mga amo.

* * *

Di lang sa plitehan nga nagpakauwaw ang LTFRB. Nagpapating sab sa laing batakan nilang gimbuhaton-ang paghatag og prangkisa sa mga sakyanang pamasahero. Di na ta kinahanglan nga motan-aw sa layo. Ang naghinobrang gidaghanon sa taxis sa Sugbo maoy sukaranan sa pasangil sa kakurakot sa buhatan.

Nagpatuyang ang LTFRB pagluwat og mga prangkisa sa taxis. Bahalag naghinobra na kun itandi sa gidaghanon sa mga pasahero. Nga nisangpot sa kagamay sa kita sa mga drayber ug nakapugos sa operators paggaid sa ilang mga sakyanan. Ang mga drayber moda lang sa taxi kun daghang pasahero-atol sa Pasko o Sinulog-apan mangitag laing kahinguhaan sa mga buwan nga tingbitay sa iro. Mao nga kun imong lilion ang mga grahe sa dagkong kompaniya sa taxi makakita kag hangtod 50 ka units nga wa magdagan.

* * *

Email: [email protected]