Dakong sala sa Monterraza

Dako kaayo og sala sa mga residente sa Sitio Dakit sa barangay Guadalupe ang developer sa Monterrazas de Cebu.

Apan gipilde lamang ang mga residente pinaagi sa impluwensiya, PR ug kuwarta sa Landco. Ang resulta, sila na hinuon ang gipapahawa sa luna nga ilang gipuy-an sulod na sa dugay’ng panahon.

Hangtod karon, padayong nagpangalot sa ilang mga ulo ang mga residente sa Sitio Dakit nganong sila pa hinuon ang gipagawas sa mga opisyal sa Cebu City Hall nga mga gahi og ulo tungod sa pagmagahi paghangop sa gitanyag nga relocation site.

Sa wala pa ang Monterraza, wala mahitabo sa Sitio Dakit ang pagbaha og lapok.

Apan tungod sa pag-abuso nila sa kabukiran pinaagi sa pagtupi niini aron kabutangan sa mga balay nga kapuy-an og mga adunahan, misugod ang kalbaryo sa mga pordoy’ng taga Sitio Dakit.

Sukad na-develop ang ibabaw’ng bahin duol sa maong sitio, baha sa tubig ug lapok ang ilang nahiagoman.

Apan imbes labanan ni Kapitan Eugenio Faelnar ang iyang mga konstituwente sa Sitio Dakit, didto hinuon kini mopabor sa Monterraza ug iya pa hinuong ipalutaw ang estorya nga sukad pa kaniadto nga magbaha ang maong lugar.

Miapil sa litrato si acting Mayor Michael Rama. Nalipay ang mga taga Sitio Dakit nga nakadungog sila og paglaban gikan ni Rama.Apan inay mahaw-as sa ilang lapokon nga kahimtang, misamot na hinuon ilang kalbaryo tungod kay si Rama naman hinuon ang mikumbinser nga mamalhin na lang sila sa relocation site sa Sitio Mahayahay.

Nindot kaayo paminawon nga mahatagan og relocation site ang mga taga Sitio Dakit. Apan ang pagpugos kanila sa pagpabalhin ngadto sa laing lugar nga supak sa ilang kabubut-on lain nga kalbaryo, ilabi nga magsugod na usab sila sa ilang pagkinabuhi sa lugar nga wala sila maanad.

Nindot paminawon ang tanyag nga relocation site, apan ambot ba kaha og nasayod ba ang mga taga Sitio Dakit nga usa kini ka “paon” nga kun mopaak sila, seguro silang mopahawa sa luna nga matud pa sa mga nangaraan sa maong lugar “strategic” kaayo sa subdivision project sa Landco.

Sa laktod, alkanse ang mga taga Sitio Dakit apan dagko kaayo og katawa ang developer sa Monterraza.

Kini ra ba’ng Monterraza usa kini sa mga subdivision nga anaa gipabarug sa bukiran sa Guadalupe.

Kun magtindog ka   bisan sa Natalio Bacalso Ave. klaro kaayo ang pagka-opaw sa mga bukiran sa Guadalupe.

Maayong awhagon nato ang kahigalaan natong environmentalists sa pagtan-aw aron babagan ang padayong pagpa-develop og mga subdivision sa bukiran sa siyudad.

Delikado kaayo sa baha sa patag ang padayong pagpang-bulldoze sa kabukiran nga wala gyuy dagkong tanom nga makit-an.

Akoy gikuyawan nga mahitabo dinhi sa siyudad ang nahitabo didto sa Ormoc nga mipatay og liboan ang baha gikan sa opaw nila nga kabukiran.

Tinuod nga aduna kitay Department of Environment and Natural Resources (DENR) nga motuon sa mga project site sa dili pa sila mo-isyu og environmental compliance certificate (ECC). Apan niini karong panahona nga hapit tanang ahensiya sa gobyerno nalambigit sa korupsiyon, dili kita makasalig kun ang pag-isyu og ECC nagsubay ba gyud sa hustong lagda.

Usa sa mga lagda ang paghimo og inspeksiyon sa project site. Tinuod kaha nga nag-inspeksiyon ang taga DENR? O sa lamesa lang sila sa ilang opisina nag-inspeksiyon?

* * *

BUKIRAN. Angayan kining laraw ni Kongresista Antonio Cuenco nga himoan og laing distrito ang dakbayan.

Sa iyang sugyot, tipunon ang tanang bukirang barangay sa siyudad gikan sa habagatan ug amihanang distrito aron himuong “mountain distict.”

Usa kini ka maayong kalambuan kun mahinayon.

Apan unsaon man niini paghinayon kun si Kongresista Raul del Mar dili andam nga mobuhi sa mga bukirang barangay nga nasakop sa iyang distrito?

Si Deputy Speaker Pablo Garcia sa ikaduhang distrito sa lalawigan naninguha man nga mabahin ang iyang distrito aron mahimo nang duha ang representante nila didto sa Ubos Balay Balaoranan.

Kun mahimo didto sa second district, nganong dili man mahimo dinhi?

Kun mabulag na ang mga mountain barangays, aduna na silang walo ka konsehal didto sa konseho sa siyudad ug aduna unya silay kaugalingong kongresista.

Sa ato pa, dili na maalkanse ang mga bukirang barangay.

Tingale, kinahanglan pa nga kumbinsehon sa mga kapitan sa bukiran nga uyon niining maong sugyot.

* * *

SENIORS. Mitiyabaw si Kapitan Felix Abella sa taho nga kadaghanan sa 80 ka mga barangay sa siyudad wala magsugod sa General Appropriations Act, hinungdan nga wala na hinuon kini gigahin nga pundo alang sa kalihukan sa mga senior citizens.

Kun tinuod kini, angayang estriktohon ang mga barangay aron mabutangan nila og pundo ang mga senior citizens subay sa gimbut-an sa balaod.

Dili lisud ang pagbuhat niini, apan mahibulong kita nganong ang mga opisyal sa barangay dili motuman niini.

* * *

Mahimo ko nga ma-text sa 0915-7817491 o masulatan sa [email protected]