Si Emiliano Tanpin Jr., inay mokiha, angay'ng mangayog pasaylo ni Napoleon Ursabia. Si Tanpin maoy tag-iya, samtang si Ursabia maoy nakapunit, sa P3 milyones nga balor sa dolyar nga nalabay sa basurahan sa Inayawan. Ang NBI ug ubang ahensiya sa kagamhanan, apil nang mga opisyal sa barangay, nangita ni Ursabia. Sa di pa sila mahinayak, mangahas ko pagpasabot nila nga si Ursabia ang biktima, di ang sad-an ning maong insidente.
Nagkalainlaing mga tinubdan nagbutyag nga ang 16 anyos nga manguykoyay og basura di maoy nagtipig sa kuwarta. Sa pikas nga bahin, way molalis nga namugna ang kaguliyang tungod sa pagpataka lang ni Tanpin pagbutang sa iyang kuwarta.
* * *
Si Tanpin mismo gikutlo sa kadagkoan sa NBI nga nagkanayon nga gitugyan ni Ursabia ang nakit-an niyang kuwarta ngadto sa mga opisyal sa Barangay Inayawan. Mga kabanay ni Ursabia niingon nga wa siya'y da nga kuwarta apan nitago lang tungod sa kahadlok.
Busa nganong pangitaon pa man si Ursabia? Nauli nang P1 milyon ngadto sa NBI. Kun tinud-on ni Tanpin ang saad nga katunga ray iyang bawion, P500,000 na lay pangitaunon. Nahibaw-an ni Tanpin nga P100,000 ray bawon ni Ursabia. Nga kun akoy pangutan-on kuwang pang ibayad sa kahasol ug kahadlok nga iya karong gibati, sa way paghisgot sa pagkahunong sa iyang panginabuhi sa basurahan.
* * *
Sa pikas nga bahin, mas dako ang atraso ni Tanpin sa kagamhanan ug mga magbubuhis:
l Nausik ang panahon sa mga basurero ug ang nihit nga luna sa garbage truck sa Calamba tungod sa iyang sako nga di diay basura;
l Naduhig sa iyang pagpabaya ang NBI nga nalipat sa mas mahinungdanon nilang tahas, sama pananglit sa paglawgaw sa PASG;
l Nasugamak sa kontrobersiya si Barangay Kapitan Rustom Ignacio ug nakaangkon na hinuon og lusot nganong wa mabadlong ang tigbakay sa Inayawan; ug
l Sakto si Barangay Kapitan Victor Quijano sa Calamba-nakalapas si Tanpin sa segregation policy sa basura.
* * *
Ang pagsabak sa NBI ni Tanpin ug ang ilang paggukod ni Ursabia nagmatuod lang hain kapusta ning gobyernoha. Sa mga adlaw nga naglisod si Ursabia pagpalit og pagkaon tungod sa kanihit sa kapuslan nga basura, may DSWD, NBI, o barangay ba nga nagpakisusi unsay ilang ikatabang? Niadtong mga adlaw nga nagtumpi ang ginansiya ni Tanpin sa iyang patigayon, nakahunahuna ba siya pagpamahin sa iyang grasya di lang sa NBI kun dili apil na sa mga manguykoyay?
Hinaot nga ang panghitabo nga nakapaila nato ni Ursabia makatudlo sab nato sa labing mahinungdanong leksiyon gikan niya: Mas dalayegon ang hilom nga pakigbatok sa kagutom pinaagi sa pakigbugno sa lang-og ug hugaw nga basura kay sa pagpagamit sa mga opisyal sa kagamhanan sa pinalabi nga mga tawo nga igo lang nabalaka nga naibanan ang ilang ginansiya.
* * *
Email:leo_lastimosa@abs-cbn.com