Pete Abangan, 81

Diyutay na lang tingali karon ang nakaila ni Pete Abangan. Apan, sa among panahon, pila lang kaha ang wa makaila sa mga Abangan Brothers – si Pete ug Vic.

Bata pa ko, panahon sa bantugang Talyux Bacalso, ang giisip nga usa sa dakung factor nga nakapadaug sa unang paglansar ni Serging Osmeña pagka-gobernador sa Sugbo. Ug kinsa man say wa makaila ni Talyux niadtong panahona? Gani sa iyang pagka-Assemblyman, daghan sa iyang mga kauban sa Parliament nagtuo nga usa siya ka abogado.

Apan, tungod kay sa politika sa atong nasud, wa ka may permanent friends, diin ang imo karong higala, imo nang kaaway ugma. Kini tungod kay dili magkatakdo ang mga personal nilang intereses.

Mao kini ang nahitabo panahon ni Serging. Nagkabuwag sila si Talyux. Imagine ang banggiitang Talyux Bacalso nakig-away na sa kanhi niya amo sa politika! 

Niadtong panahona, nauso ang matag-gabii nga rally-diskurso gawas sa headquarters. Ug panahon ni Talyux tapok-an siya sa daghan kaayong mga tawo. 

Pagkontra nila, unsa man? Grabe kaayo ang mga isyo batok ni Serging. Si Talyux ang gipaminaw sa mga tawo. Apan, dihay mga batan-on nga nangahas pag-alkontra ni Talyux, sakop sa YOL, Youth for Osmeña Leadership.

Sila si Vic ug Pete Abangan, kauban ang laing mga batan-on sa YOL, sama kanila ni Vic Balbuena, taga amo sa Opon, ug Ade Sitoy sa Cordova. Ambut pila pay akong edad niadtong panahona, basta kay di pa ko elector. Didto namugna ang slogan nga “Bisag Unsaon Serging Gihapon.” Ug tuod man, bisag giunsa pagkusokuso si Serging, midaug   gihapon. 

Maoy hinungdan nga wala ako matingala pagkauban namo ni Pete sa Department of Public Information (DPI), nganong gikuha siya ni Director Godo Roperos. Kami si Pete ang mag-uban sa mga radio program nga among gi-handle, ug sa gimantala namong news bulletin alang sa mga estasyonan sa radyo.

Usa ka silent worker, trabaho lang to siya. Di ka kadungog nga moreklamo, ug sa kalayo sa gipuy-an, wa gyud late-late. Si Pete ang kamaguwangan sa upat ka igsoon, apan siya ang katapusang mitaliwan ngadto sa laing kinabuhi. Wa mag-antus sa sakit, matud pa, he died in his sleep.