Unsay kalainan sa asawa, uyab ug kabit?

Bulahan ug suwerte kaayo ang mga Muslim kay gitugotan sila sa ilang balaud nga makatinil o makaangkon ba hinuon og daghang mga asawa. Bisan pila ka buok basta kaya lang sa pagbuhi.

Samtang kitang mga Kristiyanos usa ra gyod ka buok ang gitugot sa balaud sa atong gobiyerno. Apan bisan pa niini, gumikan lagi sa selpon karong panahona ang mga bana nakakaplag na gyod og uyab pakapin pa ang kabit kon mistress.

Kay moingon man sila nga ang pari ra ba kunoy makahibalo sa pag-iring-iring karong panahona.

Nan, ang pangutana mao kini: Unsa may kalainan sa asawa, uyab ug kabit? Kun wala manarbaho ang asawa, pundo ug mahibilin siya sa panimalay.

Maninda-tinda siya nga sarang ikaabag sa panginabuhi nilang managtiayon. Magluto siya sa pagkaon ug maghikutar sa mga anak. Manglaba ug mamalantsa sa mga sinina kun walay helper o katabang.

Samtang ang uyab ikuyog-kuyog o i-date sa mga mall, beaches ug dalhon sa loding house, motel o hotel.

Sa laing bahin, ang kabit iabang og apartment, utangan o palitan ba og sakyanan aron sa pagmintinar sa kanunay'ng higayon sa kaanindot sa lawas ug kahamis sa pamanit niini.

Maayo lang og makakabit og yaman kay makahantok kita apan kun pordoy, mahuboan ug mawagtangan gyod kita sa atong purol niining kahimtanga.

Sa akong paniid ug timbang-timbang, arang-arang og gamay ang uyab kay sa kabit tungod balayan man gyod nimo ang naulahi.

Ang uyab okay man lang sa tagbo-tagbo o kontak-kontak sa selpon apan kinahanglan nga dili masakpan ni Misis ang imong uyab o kabit kay kun masakpan gani, its the end of the world and everything.

Kinahanglan ipareha kang James Bond 007 ang pagdala mo sa papel niining butanga. O.K.?

What do you say?