Abusadong taxi driver

"Good day, Sir. Daghan pa gyod kaayong mga taxi driver nga abusado. Sama aning taxi driver nga nag-drive sa taxi nga may plate no. GWY568. Overcharging kaayo. Nisugot na god ko sa iyang demand nga plus P50 unya pag-abot sa balay nanobra pa gyod ang iyang singil. Abusado ug mapahimuslanon kaayo. Pulos ra ta mangaon og bugas, uy." -- 0908-5454868 (Sent: 08:42:07 am--October 12, 2008)

Atong ipadapog ang driver sa maong taxi sa operator niini. Kadakong binuang sa iyang kalaki. Wala pa ba diay siya matagbaw sa plus P10?

Duna gyoy mga taxi driver nga ingon niini. Kun i-tolerate ra sad sa pasahero, magdasa, mahigalam ug mosamot pag-abuso kining mga tawhana.

Ang maayong buhaton mao nga isumbong dayon sila ngadto sa nahingtungdang ahensiya sa gobyerno, partikular na sa LTFRB. Dili mapitol kining abusadong mga driver kun ang mga pasahero dili lang sab magpakabana.

* * *

"Good PM, Sir. Grabe kaayo ang paggamit og rugby boys sa mga teenager ug ang pinakabata 6-7 anyos. Kini mga rugbygirls naa mag-estambay ug mangatulog sa stalls sa namaligya og ilimnon makabuang. Mangita silag kustomer nga lalaki. Naa nay namabdos ug nanganak. Nakahibalo na ang LGU ini pero kulang og action. Nag-implement kunohay og curfew pero maayo lang sa pagsugod. Ningas kugon. Nahipos na ang uban niini apan balik ra sad sa ilang bisyo tungod kay kulang sa pagtagad sa mga otoridad. Hinaot maaksiyonan na gyod nig tinuod." -- 0927-7944136 (Sent: 12:14:47 pm--October 12, 2008)

Sakto ang atong texter. Kun tukion pag-ayo, wala gyod seryosoha ang pagpatuman sa kampanya pagsumpo sa daotang bisyo sa mga batan-on, sama pananglit sa paggamit og rugby ug sa illegal drugas.

Gawas nga wala tumana sa hingpit sa nahingtungdang ahensiya sa kagamhanan ang ilang katungdanan, nagpabaya pod ang mga ginikanan. Mora bag gusto nilang isalig na lang sa laing tawo ang paghikutar sa ilang kabataan. Dili maayong isalig na lang nato kanunay sa gobyerno ang mga buluhaton nga ato untang mahimo. Kinahanglang buhaton sab nato ang mga kaakohan nga gisangon kanato.

(Sumbong ug reklamo? Text sa 0910-8105522).