Dihang nakaykayan sa batan-ong basurero nga si Napoleon Ursabia ang usa ka sako nga dunay sud nga $60 mil dolyares didto sa Inayawan Landfill sa miaging adlaw, seguro nagdahom ang maong batan-on nga sayong pinaskuhan ni gikan sa Langit.
Apan tungod kay way motuo dayon nga tinuod ang maong salapi didto sa basurahan nagduha duha ang maong batan-on. Iyang gitug-an ang maong butang nga iyang nakit-an ngadto sa iyang iyaan nga si Victoria Candido ug sa igsuon ni Kapitan Rustom Ignacio sa Inayawan nga si Warlito Ignacio. Sanglit nagduda sila kini peke, usa ka Novo Labrada ang ilang gisugo pagpa-ilis sa usa ka gatos ka dolyar.
Dihang positibo nga nailisan ang maong dolyar gidala nila ni Warlito ug Victoria lakip na sa usa ka Goliat ang kwarta ngadto ni kapitan Rustom aron itugyan. Ang saksi sa National Bureau of Investigation mitug-an nga gidala ang kwarta ngadto ni Kapitan Rustom aron itugyan ngadto sa barangay.
Apan si kapitan Ignacio kusganon nga nanghimakak nga iyang nadawat ang kwarta. Matud hinuon sa saksi sa NBI nga positibo gyud nga nadawat ni Ignacio ang kwarta gani gikataho nga mihatag kini og P100,000 ngadto ni Napoleon Ursabia. Ang batan-on gikatahong gimanduan sa kapitan nga mokagiw. Ang NBI misusi sa pinuy-anan ni Ursabia kagahapon ug tuod wa na gyud igkita ang maong batan-on.
* * *
Sama sa gipaabot nang daan sa kadaghanan, wa gihapon molusot ang ika-upat nga impeachment complaint batok ni Presidente Gloria Macapagal Arroyo didto sa kongreso. Ang House justice committee mibotar 42-8 aron ibasura ang reklamo tungod sa kakuwang og "substance" niini.
Lima sa atong mga kongresista ang apil sa mga mibutar aron patyon ang reklamo. Ang lima mao sila si Deputy Speakers Raul Del Mar ug Pablo Garcia, Pablo John Garcia, Antonio Cuenco ug Eduardo Gullas. Ang mga pro-impeachment congressmen mihulagway sa mayoriya sa mga sakop sa komitiba nga mibotar aron ibasura ang reklamo nga mga buta, bungol ug amang.
Si Bayan Muna Party List Rep. Teodoro Casiño miingon nga way kalainan sa mga buta ang mga kauban nila nga wa makakita sa mga ebidensiya batok sa presidente. Labaw na nga way kalainan sa mga bungol nga wa gyud kadungog sa sentimento sa katawhan ug daw sa amang sila tungod sa pagdumili niini pagpakigdebate kanila. Ang tinuod bisan wa pa masang-at ang impeachment complaint batok ni Arroyo gidisidihan na ning daan sa iyang mga kaalyado nga mga kongresista.
Mao nga dili na angayang matingala ang publiko. Ang rason nga wa makiglantugi ang mga pro-impeachment congressman dili tungod kay hadlok sila nga lupigon sa mga rason sa ilang kaatbang. Ang rason mao nga nahadlok sila nga mosamot ang kasuko sa mga tawo nila tungod kay sigurado man nga pamutbot ug pagtuis ang ilang himuon.
Ang angayan nilang gihimo mao nga gipasagdan nga moabot sa Senado isip impeachment court ang reklamo ug didto pasagdan nga ipresentar ang mga ebidensiya. Dili kay sa ilang level ilang husgahan ug pangitaon ang ebidensiya.
* * *