Mga traysikad sa pier

Hangtod karon, padayon kong nakadawat og text messages nga nagreklamo mahitungod sa pipila ka badlongong traysikad drivers diha sa pier area. Naa man goy pipila kanila nga gireklamo kay imbes makatabang sila sa mga pasahero, nakahatag na hinuon silag kahasol.

Ang gireklamo sa atong kaigsuonang buot mosakay og barko mao kanang traysikad drivers nga mapahimuslanon sa higayon. Dili motug-an dayon sa klarong plitehan. Unya kun makasakay na ang pasahero sa ilang traysikad, ayha pa sila mobungat nga tag P20 diay ang plite matag pier.

Buot ipasabot nga kun ikaw gikan sa Pier 3 magpahatod ka sa pier 2, P20 ang imong plite. Kun gikan ka sa Pier 3 ug magpahatod ka sa Pier 1, P20 ang imong balayranan.

Dili ba mahal ra man kini? Lupig pa man hinuon nila ang PUJ ug taxi. Kinsa man ang may awtoridad pagbadlong niining mga tawhana? Ang mga polis ba? Ang city hall? O ang barangay nga nagsakop sa dapit diin sila namasahero?

Angay ning hatagan og pagtagad sa mga nahingtungdan!

* * *

"Good day. Naa koy isumbong ninyo bahin sa polis diri sa Lutopan, Toledo City. Akong bana nadakpan kay expire na ang license. Pero wala man nila isyuhi og TOP. Niingon man hinuon si Sir H (polis) nga pila kunoy kuwarta sa akong bana. Bisag P200 lang kuno kay bayad sa violation nga iyang nahimo. Kay lagi P100 ray kuwarta sa akong bana, niingon ang polis nga kana na lang. Mao to, gihatag sa akong bana ang P100 ug iya ming gipalakaw." -- 0907-2502004 (Sent: 12:11:15 pm--October 11, 2008)

Walay mapili sa polis ug sa imong bana kay nisuborno man sab ang imong bana ngadto sa polis.

Bayad man kaha sa violation kadtong P100, giisyuhan ba kadtog resibo? Kun wala, nahulog lang kadto sa pribadong bolsa.

Kun tinuod ang imong alegasyon, higalang texter, matawag nga pangilkil ang gihimo sa maong polis. Mas maayong magpadangat kag reklamo ngadto sa PNP Anti-Kotong Hotline nga 0927-5151515.

(Sumbong ug reklamo? Text sa 0910-8105522).