Wharfage

Usa ka magbabasa ning lindog nga nagpailang usa ka security guard (kompleto niyang ngalan atong gipugngan) mi-text kanako aron pagpadangat sa iyang concern ug sentimento. Nagpaila siya nga guwardiya sa Cebu Port Authority ug na-assign sa Sta. Rosa Port.

Ang iyang concern mahitungod sa mga abusadong polis nga na-assign ug wala na ma-assign sa Sta. Rosa. Aron inyong masabtan, akong ipatik ang katibuk-an sa iyang text:

"Ang akong reklamo mahitungod sa mga police nga na-assign diri sa Sta. Rosa or bisan kadtong wala na ma-assign diri nga dili gyud mobayad og wharfage sa ilang motorcycle nga ikarga sa pumpboat or sa barge. Ila lang ipakita ang ilang tsapa. Kami intawon, Sir, mahadlok tungod kay mga polis lagi ni sila. Dili intawon mi kapugos og paningil. Labina ning polis nga nagranggo og PO3 nga taga sitio Sentro, Tungasan, Lapulapu City dili gyod intawon ni siya mobayad sa wharfage. Igo lang ipakita ang iyang tsapa." -- 0910-5672141 (Sent: 11:20:22am--October 7, 2008)

Dili lang una ko mokomentaryo mahitungod niining maong sumbong. Hinuon, akong hatagan og higayon ang mga polis nga na-assign sa Sta. Rosa nga maoy buot tumbokon o gitumbok sa atong texter. Bukas kining lindog alang sa ilang pagpasabot sa ilang habig.

* * *

Nasagmuyo ko sa binuhatan sa pipila nato ka piniling opisyal. Aron ingnon nga aduna sila’y gihimo, managinot sa mga "gagmay" nga nagpakabuhi sa matarong nga paagi  apan wala makapahimuot kanila. Ang ilang gukdon mao ra ang ilang makaya. Pastilan ning pipila ta ka mga politiko!

Naa hinuoy mga tulisan, mga drug lord ug mga smuggler wala nila gukda. (Kay dili man nila kaya!) Kun gukdon man, dili seryosohon. Pa-pogi points lang. Gamiton lang kini sa pagpalig-on sa ilang estabilidad sa politika. Pero ang mga "gagmay" maoy apikihon nila. Aron ingnong dunay gihimo ug wala magmika!

Tiaw ba nga mas bangis pa man nga krimen alang nila ang pagsulat og mga item nga makalingaw sa publiko kay sa pagpayuhot og drugas!

* * *

 (Sumbong ug reklamo? Text sa 0910-8105522)