Polis-polis ug uniporme

Maayo bitaw nga ang mga sakop sa Barangay Intelligence Network (BIN) sa kapolisan dili g’yod pasul-obon og uniporme nga gigamit usab sa mga polis.

Dili nimo mailhan kun kinsa kanila ang mga polis ug kinsa kadtong mga ordinaryo lang nga BIN nga magluklok usab og armas.

Gituki namo kining maong punto ni Koronel Patrocinio Comendador, ang direktor sa kapolisan dinhi sa dakbayan.

Apil ang hepe sa homicide section nga si Senior Inspector Mario Monilar nakauyon sa akong sugyot nga kinahanglang dunay ilhanan nga ibutang sa ilang mga isul-ob nga T-shirt.

Pagka karon god, ang mga BIN nagsul-ob usab og T-shirt nga dunay daku kaayong marka nga CIIB sa dapit sa buko-buko. Ang CIIB nagkahulogan nga Criminal Investigation and Intelligence Branch.

Ang sugyot ni higalang Monilar mao nga mahimo lang tingali nga ang marka sa mga T-shirt nga isul-ob sa mga BIN dunay litra nga “CIIB-BIN.”

Pinaagi niini mailhan na nimo kinsa nagsul-ob niini, kun usa ba siya ka polis o sakop lang sa BIN.

Usa ko sa wala makagusto sa ubang sakop sa BIN nga saya-saya na lang nga magtakin-takin og armas. Maayo ra ba g’yod og lisensyado ang ilang armas.

Dili ba hilas kaayo huna-hunaon nga sila moapil sa pagpanakop kun dunay mga tawo nga moagi sa pagahimoon nilang checkpoint kay nagdala og armas nga walay lisensya, unya sila labaw pa diay’ng dakponon?

Bi kamong mga sakop sa BIN nga naigo niining atong punto, huna-hunaa kuno ninyo kun dili ba husto ang akong gisulti.

Alang niadtong mga BIN nga hilig kaayong magdala-dala og armas, gipalisensyahan unta ninyo ang inyong mga pusil.

Buyno kay nahuman na man ang amnesty period sa mga tag-iya og “loose firearms” wala na kamo’y mahimo pa.

Toohi ko ninyo. Lahi man god kaayo kun lisensyado ang inyong mga armas ug kompleto mo sa training kay dili na g’yod kamo basta-basta nga mogamit sa inyong mga pusil sa walay igong rason.

Tan-awa tong nahitabo sa inyong mga kauban. Bisan og walay igong rason namusil mao nga nagkaproblema na hinuon sila karon ug maamong pa ang ilang ubang kauban.

* * *

Sa pagsulat nako niining maong lindog, kauban ko ang matawag og haligi sa media dinhi sa Sugbo paingon kami sa Taiwan alang sa usa ka educational tour.

Apan sagdi lang, unya na lang nako ibutyag kun unsa ang among tumong sa pag-adto sa Taiwan.

Dili pa lang dugay, usa sa akong mga kauban sa grupo – si Bobby Nalzaro sa GMA-7 – nangutana kanako kun nganong kanunay nako nga gihimong topic sa akong lindog si Arnel Tancinco sa Citom.

Sa laktod, ang akong mga kauban nga mga editor sa mantalaan, manager sa radyo ug mga kulumnista, nakasabot nganong kanunay nako nga gisaway si Tancinco.

Matud pa nila dili g’yod tukma ang gihimo ni Tancinco nga gipili ra niya asa ipatuman ang balaud kabahin sa parking. Mao kini nga ako na usab nga pahinumdoman si Tancinco nga wala ka pa makatuman sa imong saad.

Alang nako, usa ka pa ka bakakon nga maayo lang sa sulti. Samtang kami nagsakay paingon sa airport, gipangtudlo nako ang mga dili tukma nga pagparking sa mga sakyanan nga gilingiw-lingiwan ra ni Tancinco.

Dinhi lang usa kutob Arnel, usa lang kini ka pagpahinumdom kanimo sa imong pasalig nga karon gihimo nimong walay katumanan.

Ingon ka nga patas ka nga mopatuman sa balaud, hambog ra man diay to. Kutob ra’s tumoy sa imong dila.