Basura
“Good morning, Sir. Gusto lang nakong ipahungaw ang akong gibati dinhi sa imong lindog. Mangutana lang ko kun wala na ba gyud kahay kasulbaran kining kabaho sa mga basura sa Inayawan. Hangtod kanus-a kaha ni?” -- 0921-7374747 (Sent: 11:46:51am-- October 1, 2008)
Salamat sa imong pagpahungaw sa imong gibati, higalang texter. Welcome kaayo ang imong pagpahungaw dinhi sa akong lindog sanglit usa man kini ka agony column.
Maayo unta kadto kun nagtumbok ka pa og espisipikong lokasyon diha sa Inayawan diin nahimutang ang giingon mong baho kaayong basura aron dili maglisod ang garbage collectors pagtultol niana. Dako man god ang Inayawan busa dili madali-dali pagsuhid.
Buyno, taudtaod na man kining imong text, manghinaot tang inigkapatik niini, nasulbad na ang suliran sa basura diha sa inyong dapit. Pero kun wala pa gihapon, hinaot unta nga maaksiyonan na kini.
* * *
“Good day, Sir. Naa lang unta koy ipadangat nimo. Diri sa Libo, Tayud, Consolacion naay company sa fiber glass. Baho kaayo. Ang ilang hugaw tua agas sa dagat. Among mga bata balik-balik lang ang ubo ug sip-on.” -- 0906-7990328 (Sent:10:18:33pm--October 2, 2008)
Kuyaw diay sa panglawas kanang maong pabrika sa fiber glass kun mao. Ang akong ikasugyot mao nga idangop kana ninyo ngadto sa mga opisyal sa barangay diin nahisakop kanang maong kompaniya. Adto kamo mopadangat og reklamo aron ma-check kana nila.
Mahimo sab nga i-refer ninyo kana nga problema ngadto sa health division sa munisipalidad sa Consolacion. Angay sab manginlabot niana ang committee on environmental management sa LGU Consolacion.
Mas epektibo ang aksiyon sa mga nahingtungdang ahensiya sa atong kagamhanang lokal diha sa Consolacion kun kamo mismo ang mangunay pagpadangat sa inyong reklamo ngadto kanila.
* * *
(Sumbong ug reklamo? Text sa 0910-8105522)
- Latest
- Trending
