Ang lantay sa 'Lapu district hospital

Sa di ka pa masakit ug magpadala sa Lapulapu District Hospital kinahanglan nga aduna ka nay giandam nga lantay nga imong dad-on sa pag-adto nimo sa nahisgutang tambalanan aron aduna kay kahigdaan. Kun magpa-admit ka sa Lapulapu district hospital nga magbayhon, ang mahitabo maglingkod o ba kaha magbarog ka lang sa daplin sa tambalanan kay wa man kay kahigdaan tungod kay kulang ang ilang mga higdaanan ug dili na kini makaigo sa mga pasyenteng magpatambal. May lang og dunay pasyenteng mamatay kay makapuli ka sa iyang higdaanan.

Ang nagdasok nga mga pasyente sa Lapulapu district hospital dugay nang gipaabot sa mga tagduma sa nahisgotang tambalanan ngadto sa mga opisyal sa kagamhanan sa dakbayan sa Lapulapu apan hangtod karon wa gihapon kini nila panumbalinga. Gipiyongan lang sa ilang mga mata ang mga pasyente nga nagkinahanglan sa ilang dinaliang pag-atiman. Hinuon, ang kabugnaw sa pagtagad sa mga opisyal sa dakbayan sa Lapulapu niining maong suliran di na nato ikatingala kana gumikan kay gipakadak-an man ugod sa atong mga opisyal sa gobiyerno (dili lang diha sa Lapulapu kun dili apil na ang ubang mga local government units) ang mga infrastructure projects ug ubang mga proyekto diin sa tan-aw nila mas dako sila og makuwarta maong gibaliwala na lamang ang kahimtang sa atong mga pampublikong tambalanan.

Ang kagamhanan ni Mayor Boy Radaza sa dakbayan sa Lapulapu nangambisyon sa pagtukod og balor sa napulo ka bilyon ka pesos nga reclamation project. Gani gipamugos sa iyang administrasyon nga aduna sila’y kuwarta alang niining maong proyekto. Mao ba! Maayo kay aduna diay binilyon nga salapi ang dakbayan sa Lapulapu nga gigahin sa paghimo og reclamation. Maayo kay nakahimo paggahin og pundo nga binilyon ang administrasyon ni Boy Radaza sa paghimo og reclamation diha sa iyang dakbayan. Pero kun nakagahin man og binilyon ang administrasyon ni Mayor Boy Radaza alang sa pagtukod og reclamation, wa gyud siya makagahin bisan liboan na lang nga kantidad aron magamit kini sa pagtukod og dugang edipisyo o sumpay ba kaha nga pila ka metros sa ilang district hospital aron madugangan unta ang bed capacity niini.