Bitaw no?

Tukma g’yod kaayo ang rekomendasyon nga ang mga motor butangan na og duha ka plate numbers – sa atubangan nga bahin ug sa dapit sa luyo.

Sugyot kini sa mga sakop sa National Law Enforcement Coordinating Council (NALECC) sub-committee on traffic management and anti-carnapping.

Duna la’y kuwang. Kinahanglan nga dakpon kadtong mga magmaneho og motorsiklo nga ang plate numbers anha itaud sa kilid sa motor, inay nga anha kini sa luyo sa tapaludo.

Mas nindot man usab nga butangan og laing plate numbers ang atubangan nga bahin sa motor. Kini aron makita nimo og mailhan kun kang kinsa kini nga sakyanan.

Sagad god sa motor, managsama na lang ang dagway.

Kabahin sa mga motor nga ang plate numbers anaa ibutang sa kilid, dili kini maayo. Kun makasugat kini og aksidente, unya ang drayber mopaturatoy lang pagpadagan, lisud nga mailhan ang maong motor.

Kun anha ibutang ang plate number sa kilid, dili kaayo epektibo ang pagbutang og plate numbers. Kinahanglan g’yod nga anha kini ibutang nga mag-atubang kini sa luyo nga bahin.

Unya nindot usab kaayo nga patas-an ang silot sa mga tawo nga magmaneho nga hubog. Apan daku kini nga lalis kon unsay kategoreya sa termino nga hubog.

Mahimo man nga kun motambong ka og “party” makainom ka ug maka-maneho gihapon og sakyanan nga dili hubog, apan kun isumiter na og liquor test, positibo g’yod.

Husto kaayo ang awhag ni Konsehal Edgar Labella nga angayan nga ang mga law enforcement authorities nga mohimo og estrikto nga kampanya sa mga hubog nga magmaneho gihapon og sakyanan.

Ang pangutana unsaon pag-ila sa hubog nga magmaneho og kotse? Tingali ilhon kini pinaagi sa pagtan-aw niadtong mga mag-ikis-ikis og dagan.

* * *

Salamat diay kaayo sa Globe Telecom. Ang maong kompaniya maoy labing sayo nga nakapahigayon og advance Christmas party sa mga sakop sa media.

Ang mga opisyal sa Globe nga mitambong naglakip nila ni Jones Campos ug Jerry Intig.

Ang maong kalihukan gidumala sa JY Gonzales and Partners nga maoy nagtabang sa Globe Telecom sa ilang press relations dinhi sa Visayas ug Mindanao.

* * *

Dili g’yod tinuod masulbad ang problema kabahin sa mga bata nga magpakilimos diha sa kadalanan pinaagi lang sa pagdakop kanila unya buhian lang usab.

Labi na karon nga dili ka makabasta-basta og dakop sa mga bata. Ang syudad dunay awhag sa kapolisan nga paspasan ang paghimo og kampanya sa mga bata ug dagko nga magpakilimos diha sa mga motorista.

Apan kun dili gani sulbaron ang “economic problem” magpabilin nga ang maong problema dili kahatagan og sulbad.

Ambot, duna koy sugyot nga ang mga ginikanan niining maong mga bata ang himoan og aksyon.

Dunay balaud, ang Presidential Decree 603, Child and Youth Welfare Code, nga mosilot sa mga ginikanan nga nagpasagad lang sa ilang mga anak.

Kini maoy maayong gamiton aron katudloan og leksyon kadtong mga ginikanan nga maayo lang mohimo’g bata, apan dili makamao moatiman.

Panahon nga manuktok na sa mga sakyanan kining maong mga bata, sa hilom moturok sa akong huna-huna ang kalagot sa ilang mga ginikanan.

Nagpatuga-tuga og panganak apan dili makamao moatiman. Kun walay pagkaon sa ilang panimalay, natural ang mga bata mapugos sa paghimo og paagi, apil na ang pagpakilimos, aron lang makakaon.