"Good day, Sir. Moreklamo lang ko anang kanal diha sa T. Padilla kay nag-anam nag kamabaw. Gamay lang nga ulan magbaha dayon. Ang Bonifacio ug Sikatuna Sts. kay moawas ug mosugwak na man ang kanal. Maayo seguro nga aksiyonan ni aron masulbad kay ting-ulan na ra ba karong buwana. Thanks." -- 0917-7226011 (Sent: 04:54:41 pm--August 28, 2008)
Salamat sa imong concern, higalang texter. Inigkapatik ining imong reklamo posibleng naaksiyonan na ang problema sa kanal diha sa T. Padilla. Wala man god dayon nato matagad ang imong text tungod sa daghang mga sumbong ug reklamo nga nag-una pa niini.
Hinuon kun hangtod karon wala pa gihapon maatiman ang kanal diha sa T. Padilla nga nag-anam nag kamabaw. Mas maayong aksiyonan na kini sa mga nahingtungdan. Nagtuo ko nga ang barangay maoy unang angay manginlabot sa maong problema.
Palihog, aksiyoni ninyo!
* * *
Usa ka multicab driver nga naggamit sa cellphone number 0905-8054521 mi-text nako (Sent: 07:00:39am--August 30, 2008) aron pagpadangat sa iyang reklamo mahitungod sa mga mangotongay diha sa Opon.
Sumala sa iyang text, silang mga driver sa multicab pangayoan og tag P10 inig-abot nila sa may simbahan atbang sa dunggoanan sa ferry boat.
"Pait kaayo ang among kahimtang," nagkanayon ang atong texter sa SMS nga iyang gipadala kanako.
Okey lang unta kun ang pagpangolektag tag P10 pinasubay sa balaod o ordinansa. Ang nakaparat kay nahisulod man ang kuwartang nakolekta sa usa ka pribadong bolsa.
Sumala sa atong texter, mga dispatser ang mangolekta nilag tag P10. Apan nagtuo sila nga sinugo ang maong mga dispatser sa mga enforcer kay ila man nga makit-an nga magdungan og snack ang dispatser ug enforcer!
Sa akong pagtuo, morag sakto ang pangagpas sa atong texter. Angay ning ma-verify kun unsa kini ka tinuod. Hinaot unta nga i-counter check ni sa nahingtungdang ahensiya sa gobiyerno, partikular na sa lokalidad sa Lapulapu City.
* * *
(Sumbong ug reklamo? Text sa 0910-8105522)