Mga dapit nga naay dispatser

Daghan gyod ang mga driver og sakyanang depasaheroan--jeep, multicab, taxi ug uban pa--nga nahasol sa modus operandi sa mga dispatser. Abusado man sab god kaayo ang mga dispatser. Naa ganiy uban nga dili na lang morespetar sa pagpanawag og pasahero. Modiretso na lang pagpangayog kuwarta ngadto sa driver o konduktor.

Pangdelihinsiya kining ilang gihimo. Extortion. Angayan kini silang badlongon. Angayan dakpon. Pero hain na man ang mga awtoridad? Nganong gipasagdan man nila ang mga dispatser?

* * *

Sumala sa daghang mga sumbong nga akong nadawat, salbahis kaayo ang mga dispatser diha sa Lapulapu City, labina dapit sa may Mepz. Hasol kuno kaayo, sumala pa sa mga driver.

Sa Colon area sa dakbayan sa Sugbu, aktibo sab kaayo ang mga dispatser sa pagpasalir sa ilang tinonto. Mas dayag ang modus sa mga dispatser sa may eskina sa Colon ug Osmeña Blvd. Dili mahadlok bisan pag-visible ang presensiya sa mga polis, Citom ug uban pang law enforcers. Ambot kun unsay gisaligan ining mga tawhana.

* * *

Naa sad sa eskina sa Colon ug Legaspi. PUJ ug taxi ang delehinsiyahan sa maong dispatser. Bisan walay mosakay nga pasahero mukolekta gyod siya ngadto sa driver sa PUJ. Usahay moabot ang maong dispatser ngadto sa tungod sa main entrance sa Colonnade Mall.

Langas sab kaayo ang mga dispatser diha sa gawas sa South Bus Terminal. Kanang mga PUJ nga magbiyahean sa Talamban maoy kasagaran nilang delehinsiyaan.

* * *

Diha sa Magallanes St., sukad sa usa ka banko sangko ngadto sa usa ka unibersidad dapit, naa say dispatser diha. Kasagaran sa hapon ngadto na sa kagabhion ang operasyon sa maong dispatser.

Daghan sab ang mireklamo bahin sa dispatser nga naa atbang sa Metropolitan Cathedral. Abusado kuno kaayo ang maong dispatser.

Nangreklamo sab ang mga PUJ driver nga moagi diha sa F. Ramos, luyo sa Robinsons, kay naa say daghang dispatser diha nga mangdelehinsiya.

Hain na man ang anti-dispatching ordinance? Kanus-a pa man mabadlong ug masumpo sa hingpit ang mga dispatser?

(Sumbong ug reklamo? Text sa 0910-8105522).