Nagbagulbol kay gustong modawat

Pipila sa mga huwis sa dakbayan sa Sugbu wa makauyon sa gihimo nilang RTC judge Mienrado Paredes ug Gabriel Ingles nga pagpadala og suwat ngadto sa probinsiya ug dakbayan sa Sugbu aron balibaran ang binuwan nila nga cash allowance.

Ang mga kauban nilang huwis giingong wa malipay tungod kay duna kuno sila'y kasabutan nga mohimo sila og hiniusa nga baruganan kalabot niini. Ang mga huwis hinuon nga wa makauyon hilom lang nga nagbagulbol ug wa gani’y kaisog nga magpakutlo sa mga sakop sa media.

Ambot unsay ilang gi-ayran sa gihimo nilang Paredes ug Ingles, ang wa ba pagtuman sa ilang kasabutan nga mohimo sila og hiniusang baruganan o ang pagbalibad sa allowance?

Ang tinuod way dautan sa gihimo nilang Peredes ug Ingles, gani angayan kining daygon tungod kay mao kini ang husto ug tukma nga lakang nga angayan nilang buhaton.

Nasuko sila nga mapugos napod sila pagbalibad sa ilang allowance tungod kay giunhan sila ni Paredes ug Ingles? Kun duna silay kauwaw ug dyutay’ng delikadisa angayang mosunod pod sila pagbalibad sa ilang gidawat nga allowance gikan sa dakbayan ug lalawigan sa Sugbu.

Maklaro sa sinultihan sa ubang mga huwis nga nahanugon sila sa allowance mao nga nagbagutbot sila sa gihimo ni Paredes ug Ingles. Sigurado man gyud ko nga mauwaw sila nga mao na lay modawat sa allowance.

Ang maayong buhaton sa mga huwis mao ang pagsunod sa gihimo sa ilang kauban inay nga magbagolbol. Ipakita ninyo nga ligdong ug dunay kridibilidad ang mga huwis sa Sugbu.

Di gyud kalikayan nga bisan og wa mo’y gibuhat nga dautan apan tungod kay nagdawat mo og allowance gikan sa mga LGU motumaw ang pagduda nga inyong gitayopi ang mga kaso nga naglambigit nila.

Gawas pa wa malilong nga dunay mga abogado nga konsehal sa dakbayan nga padayong nagpraktis sa ilang propisyon sa pagkakaron. Unsa may ikasulti sa publiko kun ang maong abogado nga konsehal modaug sa iyang kaso diha sa sala sa huwis nga nagdawat og allowance sa dakbayan?

Labi pa og ang maong abogado nga konsehal maoy mi-sponsor sa resolution nga naghatag sa huwis ug hinabang?

Dayag ug tataw nga dunay conflict of interest niini, busan aron malikayan ang pagduda angayang sundon sa ubang huwis sila si Paredes ug Ingles.

Bisan pa og inyong akusahan ang duha nga gustong magpakita nga sila “self-righteous” apan ang tinuod ug ang tan-aw sa publiko nila tinud-anay nga ligdong.

Sila maoy unang nitubag sa hagit nga ipabilin nga independent ug kridible ang hudikatora. Kamo unsa may inyong gihimo?

Dili ba nagpadiki-diki, para unsa paabuton nga mohilom ang isyu diha sa media ug padayonon ang pagdawat og allowance? Pagbaton sab mo og dyutay nga kauwaw uy!

* * *

[email protected]