Kinsa ba kining kapitan sa usa ka barangay sa Dalaguete nga nasakpan nga migamit sa kwarta sa gobyerno sigun pa sa iyang barangay treasurer.
Ang akong agent diha sa Dalaguete nga si 999 maoy mipahibalo niini kanako.
Sa pag-audit sa mga sakop sa Commission on Audit (COA) sa barangay, nasakpan nga kuwang og P100,000 ang kwarta sa treasurer kay kuno gigamit sa kapitan.
Makaingon kita nga personal ang gigamitan niadto kay kun gigamit pa alang sa proyekto sa kagamhanan, moingon ra man ang treasurer nga gigasto kini sa paghimo og proyekto.
Mauwaw tawon ta Capt. Iuli na ang kwarta ug ayaw’g usba ang paggasto sa kwarta nga dili imo.
* * *
Laing report sa akong agent mao nga “unique” kuno kaayo ang checkpoint nga gidumala sa mga polis sa Dalaguete nga himoon panahon sa kaadlawon kay mga tigtumod ra’g isda ang pangparahon.
Unya kun tunolan na og isda ug gamay’ng kantidad, papadayonon lang kuno sa pag-agi ang mga sakyanan. Lain kini nga kalihukan nga angay’ng putlon Sir.
Ayaw kalimot Sir nga daghang mga mata ang nagtan-aw kaninyo. Mahimong ang mga drayber o ang ubang sakay sa truck nga inyong kilkilan, motug-an.
* * *
Husto kaayo ang awhag ni acting Cebu City Mayor Mike Rama ngadto sa Ombudsman nga dili apilon pagdakop ang iyang service vehicle ug sa mga konsehal nga gamiton sa pag-inspection sa mga sam-ang.
Sigurado ko nga ang Ombudsman nga nagpahigayon og Oplan Red Plate mohatag og konsiderasyon sa maong awhag. Kaming mga sakop sa media nasayod nga si Rama ug ang mga konsehal mohimo g’yod og inspection sa mga menteryo panahon sa All Saint’s Day ug All Soul’s Day.
* * *
Kun gipatuman pa g’yod diay ang ordinansa, ang mga balaud, ang atong mga sam-ang kon menteryo dili mapuno sa kabalayan.
Dunay karaan kaayong ordinansa nga namugna adtong 1953 nga nagdili sa pagtukod og balay nga may gilay-ong 25 metros gikan sa mga menteryo.
Ang pangutana nganong wala man bantayi nga walay makalapas niini?
Apan tan-aw nako, nga may pagka kwestyonable hinoon ang maong ordinansa. Makuhaan na diay sa katungod ang mga tag-iya sa yuta nga nahimutang sa sam-ang?
Ang husto mao nga ang idili mao ra g’yod ang pagmugna og panimalay diha sulod sa mga menteryo, sama diha sa menteryo munisipal sa Lorega-San Miguel.
Sa akong giingon sa makadaghan na nga higayon mao nga pwerteng daghana natong mga ordinansa ug mga balaud apan wala kini mapatuman.
Unya, diha sa atong mga menteryo publiko, tan-awa ra god ang sitwasyon. Kitang mga pobre hapit wala nay kalubngan kun dunay mga paryente nato nga mamatay.
Unsaon nga ang nagdumala sa mga menteryo, hakug kaayo og salapi ug gipamaligya ang luna sa menteryo ngadto sa mga adunahan.
Mao na ang rason nga bisan diha sa mga sam-ang publiko makita nimo ang dili gihapon patas nga sitwasyon.
* * *
Sa katapusan, pahimuslan na usab nako ang pag-awhag sa daw nabungol na nga si Arnel Tancinco sa Citom nga tumana na ang imong pasalig nga aksyonan nimo ang mga reklamo.
Kini aron dili ka mahulagway nga hambugero kaayo Arnel nga maayo lang sa panghambog.
Dili ka g’yod makamahay sa mga tawo nga magduda kanimo nga nakadawat ka’g kwarta aning mga balay-patigayon nga bisan wala motuman sa lagda imong gipasagdan.