Kortesiya sa mga taxi driver

Maghisgot tag turismo, ang mga taxi driver maoy atong maisip nga mga front-liner, ug show-window pagpalambo sa industriya sa turismo, di lamang dinhi sa Sugbo, kondili sa tibuok nasud.  

In most instances, kun langyaw nga mga dumoduong ang hisgutan, ang mga taxi driver, maka-create gyud og first impression sa mga langyaw. Sa ato pa, kun maglago lang ang mga driver, unya, manimaho pa gyud, dili kini makahatag og pabor nga impression bahin sa mga Sugbuanon.

Unya, gawas niini, pakapinan pa gyud sa pagka-walay tukmang pamatasan sa dealing sa mga pasahero, ma-langyaw o ma-domestic. Ang uban nila, magpili og pasahero ug gilay-on sa destination. Hangtud hinoon nga masakyan silag hold-upper .

Daghan kaayong mga reklamo batok sa mga taxi driver. Ambut apil ba ni sa mga seminar nga ihatag sa LTO – kining kortesiya sa kadalanan.

Usa ka senior citizen, pag-abut sa destination, mihangyo nga di lang unta siya pabayron sa plus ten, kay nakadungog kono siya sa radyo nga exempted ang mga senior citizen sa maong dugang nga plite.

Nasuko ang driver, gisingkaan siya ngano kono nga ang mga senior citizen ang magbuot. Mahal ang gasolina, daku ang ilang abang, unya hangyoon pa gyud.

Wa na lang motubay ang senior citizen, mitunol plite plus ten. Daku ang iyang kahiubos. Gitahod ug gipangga kaayo siya sa iyang mga anak ug mga apo. – ug sa iyang kahigalaan – and here comes a taxi driver, misingka kaniya. Pastilan!

Laing higayon, usa ka senior citizen mi-flag down og taxi. Pagsulti niya nga duol ra ang iyang padulngan, mibalibad ang driver, kay maniudto pa kono.

LTO, LTFRB, DEPT OF TOURISM —— mao ni ang atong mga taxi driver? Unta, himoon usab kini nga look out ug responsibilidad sa mga operator mismo. Importante kaayo ang grooming ug kortesiya.

On the other hand hinoon, duna say mga maayong driver. Limpiyo, di manimaho, di magpahaguros og padagan, ug matinahuron kaayo. Ang uban nila, mouli pa sa mga butang nga mahibilin sa ilang unit. Mao ni sila ang makatabang pagpalambo sa turismo.

Ug Dro, wa na diay to ipatuman ang pagsul-ob og uniform sa mga driver? Moni depekto sa atong gobiyerno, maayo las bag-o pa, ug di ka-sustiner kun unsa man ang buot nilang ipatuman.