Kredibilidad sa mga Huwis apektado

Husto ang gihimo nila ni judge Gabriel Ingles ug Mienrado Paredes nga paghunong na pagdawat sa binuwan nga allowance gikan sa probinsiya ug dakbayan sa Sugbu. Gani alang nako dugay ra unta kining angayang gihimo sa mga huwis dinhi sa Sugbu.

Bisan kun mahulagway nga nalangan apan di pa awahi ang tanan aron ilang korehian ang sayop nga praktis sa mga huwis pagdawat og allowance gikan sa mga local government units.

Bisan ibutang nato og gitugot sa balaud nga modawat og allowance ang mga huwis gikan sa mga LGU, apan di kalikayan nga makompromiso ang ilang kredibilidad labi na og moabot ang higayon nga ang mga LGU nga naghatag nila og allowance mamahimong subject sa kaso.

Wa tingali problema kun dili maningil ang mga LGU sa allowance nga ilang gidawat pinaagi sa pag-pressure nila nga mohimo og paborableng hukom. Bisan pa gani pananglitan og husto ang desisyon nga ilang gihimo di gyud kalikayan ang mga pagduda.

Busa aron paglikay sa kontrobersiya ug pagmintinar sa kredibilidad sa husgado angayan lang nga balibaran sa mga huwis ang bisan unsa nga personal nga allowance nga ilang gidawat gikan sa mga LGUs.

Sigun sa kasayuran nga akong nahipos ang probinsiya naghatag og P6 mil nga allowance sa tanang huwis sa Sugbo matag buwan. Wa ni labot sa mga P5 mil sab nga gihatag sa dakbayan alang sa mga huwis sa RTC dinhi sa dakbayan.

Sa ato pa ang mga RTC judges dinhi sa dakbayan nagdawat og labing minus P11 mil matag buwan nga allowance dugang sa ilang sweldo gikan sa Korte Suprema.

* * *

Wa untay kontrobersiya niining paghatag og allowance sa mga huwis kun wa matribukar nga giinitan sa lalawigan si judge Bienvenido Saniel tungod sa desisyon niini batok sa probinsiya sa kaso maylabot sa pagtudlo og director sa MCWD.

Sigun sa nigawas nga mga report gipaputol sa probinsiya ang allowance ni Saniel human niya gipakanaog ang desisyon. Wa hinuon mokompirmar ang Kapitolyo niini.

Apan ang kasaligang tinubdan mitug-an nga si acting executive judge Silvestre Maamo nakadawat gyud og memorandum gikan sa probinsiya nagmando nga ipatangtang sa payroll si Saniel.

Ang maong memorandum maoy nakaaghat nilang Ingles ug Paredes nga mopadala og suwat ngadto ni Gobernador Gwen Garcia ug sa dakbayan aron ipahibawo nga mohunong na sila pagdawat sa ilang allowance.

Giangkon ni Paredes nga ang ilang gihimo agi’g pagduyog sa ilang kauban nga si Saniel.

Mao ni ang akong giingon nga kun wa pa unta sila modawat sa sinugdanan og allowance gikan sa mga LGU dili unta sila mahiagom sa pressure. Unya karon nga natribukar nga duna gyuy pressure gikan sa Kapitolyo, motuo pa kaha ang katawhan nga kadtong uban nga mga kaso nga gilambigitan sa Kapitolyo diin sila midaog tinud-anay gyud nga hustisya ang mipatigbabaw ug wa madala sa pressure ang huwis?

* * *

[email protected]