Jocjoc ug ang abuno
Nauli na gayod dinhi sa nasud si Jocelyn “Jocjoc” Bolante, ang nagtagong opisyal sa departamento sa agrikultura nga misibat human sa 2004 nga bugnong lugaynon. Si Bolante ang giingong arkitekto ug utok sa pagkahanaw sa 728 milyones ka pesos nga kabahin sa 2.8 bilyones ka pesos nga fertilizer fund.
Sigon sa mga papeles, si Bolante tago nga mipadali sa pagpagawas sa nahisgutang kantidad aron ipamalit og abuno para sa mga mag-uuma apan way abuno nga miabot ngadto sa mga mag-uuma. Ang 728 milyones ka pesos nga kantidad tagong gipagawas ni Bolante usa o pipila ka buwan sa wa pa magsugod ang kampanya sa tuig 2004 nga piniliay. Uwahi na dihang nadiskobrehan nga ang pundo gipagawas diay aron ipamalit og boto para sa kandidatora ni pangulong Arroyo ug dili para ipamalit og abuno. Kini sigon sa pasangil sa kaatbang ni Arroyo sa politika.
Human mabulgar, si Jocjoc Bolante kalit lang nga nahanaw, misibat ug mitago didto sa Amerika apan gidakop sa mga amerikano human gipakanselar sa senado sa Pilipinas ang iyang visa aron mopauli ug atubangon ang imbestigasyon nga gihimo sa senado. Apan gitapos na lamang sa senado ang ilang imbestigasyon tungod kay wa gyoy Bolante nga misipot. Girekomendar sa senado ngadto sa Ombudsman nga pasakaan og kaso si Bolante pero upat ka tuig na lang ang milabay wa gyoy kasong gipasaka ang ombudsman batok kang Bolante. Kaniadtong Martes sa gabii balik Pinas na ang gamhanang tawo.
Sa iyang pagbalik nag atang nang daan ang Sgt-at-arms sa senado alang sa pagdakop ni Bolante apan wa kini makasignit kaniya tungod kay usa ka luya ug masakiton nga Bolante ang nahiabot ug gidiritso kini sa paghatod sa tambalanan.
Masakiton gyod kaha si Bolante? Wa lang kaha ni siya makahulam og idiya ni Ruben Ecleo Jr. nga nagpasakit-sakit aron tugtan nga makapiyansa? Karon nga nauli na dinhi sa nasud si Bolante mahatagan na kaha niya og katin-awan ang katawhan mahitungod sa fertilizer fund scam? Sa laing bahin kun tinuod man siyang masakiton, di kaha ni siya tiwasan aron hingpit nang mahilom sa iyang mga nahibaw-an?
- Latest
- Trending
