Computers sa San Fernando

Nadapit akong atensiyon sa mikatap nga text messages mahitungod sa usa ka website kang kansang tiggama nangangkong taga lungsod sa San Fernando.

Sa website nga “tagasanfernando.blog.com” gibanhaw ang isyu sa gipang-donar nga mga computer nga giingong gipanghimulbulan sa mga tawo sa mayor una pa kini gihatag didto sa Sangat National High School.

Naglibog ko nganong nabanhaw sa pag-usab ang maong isyu nga niadto pa man diay’ng Mayo 15, 2008 kini naabot dinhi sa Sugbo nga gikarga sa 40-footer container van.

Sumala pa sa nasulat sa maong “blog” nga pinetsahan og Oktobre 12, 2008, gidonar ang maong mga computer, accessories ug mga libro sa Bless of Mind Foundation nga gipanguluhan sa taga San Fernando nga si Racquel Kristina Enad, apan sa pag-abot sa container van didto sa lungsod sa San Fernando giingong gideretso kini sa munisipyo una pa gideretso og deliver sa Sangat National High School.

Gibutyag sa maong blog nga gipilian pa sa mga tawo sa mayor ang mga computer una pa na-deliver sa naasoy nga tunghaan, nga matud pa, gikasuko sa prinsipal. Pero gitataw sa tagsulat sa blog nga gibase lamang niya ang impormasyon sa “estorya nga iyang nakuha” nga sa ato pa, mura’g tsismis.

Si Mayor Lakambini Reluya nahibulong nganong nabanhaw pagbalik ang isyu nga dugay naman unta kining nasulbad. Wala siya magpanuko og tug-an sa among tigbalita nga mihinabi kaniya nga politika ang hinungdan sa pagbalikbalik sa maong isyu.

Ang konseho sa lungsod sa San Fernando gibahin sa duha ka grupo –- grupo ni Bise Mayor Mico Canoy ug kang Mayor Reluya. Apan ang nakaparat, ang SK federation president nga ex officio member sa konseho ang sa mayor. Wala hinuon kita masayod kun pirme ba nga alkansehon ang mayor tungod sa maong set-up.

Nakadungog ko og balita nga gidawat sa Ombudsman ang reklamo mahitungod sa maong isyu. Wala hinuon kita mahibalo kun giseryoso ba nila kini.

Seryoso ang alegasyon batok ni Mayor Reluya. Bugtong makalimpyo sa iyang ngalan niining isyuha mao ang negatibong resulta sa imbestigasyon, kun ugaling may pakisusi na nga gihimo ang Ombudsman.

Sa akong tan-aw, adunay daghang tan-awonon sa maong isyu. Sama pananglit sa intensiyon sa “donor” niini sa dihang gihimo ang donasyon.

Pagbuot ba niya nga ipaagi sa mayor?

O buot lamang niya nga ang mayor maoy pabayron sa pagpa-release niini sa Bureau of Customs ug trucking, apan ang tunghaan sa Sangat gyud ang magbuot sa maong mga butang nga gipangdonar?

* * *

KAPITOLYO. Nabulabog ang pagpang-apod-apod og mga deed of sale ni Gobernadora Gwendolyn Garcia ngadto sa mga benepisyaryo sa Ordinance 93-1 sa lalawigan sa Sugbo niadtong miaging Lunes.

Kini, human niya masayri nga adunay mga ngalan sa mga apektado sa maong ordinansa nga naapil sa lista sa pangtagaan sa deed of sale, apan nasota nga wala pa diay maka-impas og bayad sa luna nga iya sa lalawigan.

Sa ato pa, adunay anomalosong pagpang-insert og mga ngalan sa mga benepisyaryo sa 93-1 diha sa listahan nga panghatagan sa deed of sale, bisan wala pa maka-impas sa obligasyon niini sa Kapitolyo.

Pastilan no! Ingon niini nga sitwasyon mahitabo pa diay sa usa ka dakong buhatan sa Kapitolyo?

Tiaw mo na, buhatan mismo sa gobernadora aduna pa diay mga tawo nga dili kasaligan?

* * *

VILLAR. Niadtong Lunes, nakadawat ko og tawag sa telepono gikan sa usa sa atong mga readers aron lang mo-react sa atong komentaryo mahitungod niadtong panglingla nga TV advertisement ni Senate President Manny Villar.

Gusto sa maong reader nga matubag nako iyang pangutana kun kinsay nagbayad sa mga TV advertisement ni Villar nga nanghambog sa mga Pilipino nga siyay instrumento sa pagpapauli sa mga OFWs nga giabusohan sa ilang mga amo didto sa gawas sa nasud.

Apan maayong motug-an kita sa tinuod nga wala gyud kita masayod kinsay gipapas-an ni Villar sa pagpabayad nianang hapit kada adlaw nga TV advertisement niya.

Kun gikan kini sa panudlanan sa gobyerno, maayong tabangan nato siya pagsaway tungod kay dili makiangayon nga ipanghambog iyang kaugalingon diha sa telebisyon pinaagi sa kuwarta sa katawhan.

Kun gikan sa kaugalingon niyang bulsa ang gibayad sa mga TV stations, maayong dili nato siya pilion sa sunod nga eleksiyon kun modagan og balik pag-senador o mag-presidente tungod kay nakaseguro kita nga mamawi kini sa kuwartang iyang gibayad.

* * *

SOC. Midagan na ang recall paper batok ni Mayor Socrates Fernandez.

Wala pa hinuon kita masayod pila na ka pirma ang nalikom sa nagpasiugda niini, ang giila nga whistleblower nga si Cris Saavedra.

Nasayod na kita sa hinungdan sa recall move batok ni Mayor Soc. Tungod kini sa pagpunay niya og dupa sa badlongon niyang sinagop nga si Joavan Fernandez ug giingong paggamit niya sa iyang gahum aron mahaylo ang mga biktima sa iyang sinagop nga dili na lang mangita og hustisya.

Apan dili kalikayan nga aduna gihapoy mga grupo sa Talisay nga dili buot nga ma-recall ilang mayor.

Wala lang ko maka-uyon sa pamahayag nga adunay mga politiko nga interesadong matangtang sa katungdanan si Mayor Soc.

Pastilan gyud! Klaro na kaayong mi-abuso sa gahum si Mayor Soc pinaagi sa pagpatrabaho sa mga Abellana aron dili na lang mokiha ni Joavan, unya ipasangil gihapon sa mga kaatbang?