Ang motorsiklo ug mga kriminal

Misiaw na pagmaayo kining mga kriminal nga nagmotorsiklo dinhi sa Sugbu. Gani sa tanang rehiyon sa nasud, ang rehiyon 7 maoy nag-una sa pinakadaghan og krimen nga binuhatan sa mga kriminal nga nagsakay og motorsiklo.

Aron masumpo, ang rehiyonal nga buhatan sa atong kapolisan miumol sa ilang gitawag og Task Force Motorcycle aron maoy mogukod niining maong mga kriminal. Apan daw gihagit sila sa nahisgutang mga kriminal tungod kay aduna na usab kini gitumba kaniadtong miaging adlaw sa may unang taytayan nga nagdugtong sa Mandaue ug Lapulapu.

Police ang ilang pinaka-uwahing gitumba, si PO2 Jose Clint Cañete nga sakop sa anti-illegal drug task force. Ang biktima gikan pa lang mitambong og bista sa kaso diin usa siya sa mga testigo.

Dako og posibilidad nga ang nagsakay og motorsiklo nga mipatay kang PO2 Jose Clint Canete dili mao ang responsable sa drive-by-shooting didto sa dakbayan sa Lapulapu ug sa ubang dapit dinhi sa Sugbu. Labing seguro di pod ni sila ang mga tulisan ug mga manglabnihay nga magsakay og motorsiklo. Gani labing seguro lain-lain kini sila nga indibiduwal apan usa lang ka matang sa sakyanan ang ilang gihimong escape vehicle - mga motorsiklo kay nangopya sa mga vigilantes.

Ang mga kriminal nga magmotorsiklo ang usa sa mga hinungdan nga aduna nay mga tawo nga dili na mosakay og motorsiklo ug gipamaligya na sa uban ang ilang motorsiklo kay nahadlok nga maalaan nga kriminal. Ambot kaha og kusog pa ba ang halin sa mga tindahan og motorsiklo dinhi sa Sugbu. Kun mikunhod o misaka man ang ilang halin, duha ray atong mahuna-hunaan - daghan nang nahadlok nga maalaan kriminal o daghan nang kriminal.

Ang mga kriminal ug mga tawo nga nakahuna-huna sa paghimo og krimen mogamit gayod sa motorsiklo sa ilang paghimo o pagahimuon nga krimen tungod kay convenient kini alang sa ilang pagsibat. Gawas nga convenient lisod pa gyud sila nga mailhan tungod sa kamandoan sa LTO nga kinahanglan kadtong magmotorsiklo magsul-ob og helmet. Maayo na lang gani kay wa idayon sa pagpatuman ang bag-ong patakaran sa nahisgutang opisina alang niadtong mga magmotorsiklo sama sa pagpasul-ob og jacket, gloves, karsones ug sapatos, mosamot gyud unta nga dili mailhan ang mga kriminal.