Kudos sa Mandaue Polis

Naprubahan gyud pinaagi sa laboratoryo nga ang sinagop ni Mayor Socrates Fernandez usa ka drug addict nga maoy posibling hinungdan nganong nagkapuliki ni og panubag sa daghang kutay sa mga kaso nga gipasaka batok niya.

Ang chemistry report sa National Bureau of Investigation nagpakita nga si Joavan Fernandez positibo sa paggamit og illegal nga drugas. Si Rommel Paglinawan ang forensic chemist sa NBI-7 miingon nga basi sa iyang gihimo nga confirmatory test sa ihi ni Joavan iyang namatud-an nga positibo siya paggamit og shabu.

Ang presensiya sa methamphetamine ug sa metabolite niini nga amphetamine nakita didto sa ihi ni Joavan.

Karon nga positibo si Joavan nga maggamitan og illegal nga drugas, mamasangil lang ba gihapon si Mayor Soc Fernandez ngadto sa mga sakop sa media ug sa iyang mga kontra sa politika nga mihimo og black propaganda?

Black propaganda ba lang gihapon ni alang ni Mayor Soc labi pa nga dunay laing tulo ka kaso nga gisang-at ang NBI batok ni Joavan didto sa Talisay City Prosecutors’ Office?

Ang NBI misang-at og mga kasong illegal possession of drug paraphernalia, drug use ug illegal possession of ammunition.

* * *

Saludo ko sa kapolisan sa Mandaue sa paspas nga kasulbaran ug pagkasikop sa responsabli pagpanghulga sa duha ka mga huwis sa dakbayan sa Sugbu ug Mandaue.

Mihakop ang kahingawa sa mga kawani ug mga huwis sa Sugbu ug Mandaue sayo ning semanaha human usa ka suwat ang nadawat nilang Judge Teresita Galanida ug Soliver Peras nga nanghulga nga posibling dunay moulbo nga bomba diha sa ilang sala niadtong Martes.

Ang hulga gikan sa usa ka babaye nga nagpa-ila nga asawa og usa ka membro sa rebelding Moro Islamic Liberation Front.

Dungan sa giingong adlaw nga mahitabo ang pagpamomba, nadakpan sa kapolisan sa Mandaue ang giingong responsabli sa pagpanghulga nga si Erlinda Cagata.

Si Cagata nga taga Clarita Village, Punta Princesa gisikop sa mga polis tungod sa bench warrant nga giluwatan ni Judge Galanida human siya mapakyas pagtambong sa hearing sa iyang kaso.

Apan bisan wa pa siya malutsi sa bench warrant daan na siyang gipangita sa kapolisan human ang kawani sa LBC diha sa Colon mitumbok niya nga maoy nagpadala sa suwat alang nila ni Galanida ug Peras niadtong petsa 8.

Di malimtan sa kawani sa LBC ang panagway sa maong babaye tungod kay kahibugngan nga magpadala siya og suwat sa duol ra kaayo nga address.

Bisan kun klaro nga ang tumong sa pagpanghulga gituyo aron ma-postpone ang husay sa iyang kaso nga sa ato pa peke ang maong pagpanghulga, angayan gihapon nato nga pasalamatan ang kapolisan sa epektibo nila nga intelligence.

Bisan kun way tinuod nga hulga gikan sa mga dautang elemento, husto ang gihimo sa kapolisan nga di mokompiyansa ug kanunay’ng isipon ang matag hulga nga tinuod.

Akong balikon, saludo ko sa kapolisan sa Mandaue ug hinaut nga magpadayon ang inyong maayong binuhatan ug kakugi.

* * *

[email protected]