Walay political will

Gawas nga maayong hugtan ang paghimo’g kampanya batok sa mga mamaligya og mga matang sa pagkaon nga hupas, kitang mga pumapalit angay usab nga magbantay aron dili kita mabiktima sa mga mapahimuslanon.

Nakadungog ko nga dunay mga tawo karon nga ang negosyo mamalit og mga hupas nga baligya, ingon man kadtong mga baligya nga hapit na moabot ang iyang expiry date, dayon ibaligya nila sa barato kunohay nga presyo.

Pasalamatan nato si market administrator Raquel Arce kay nasakmit sa iyang mga sakop ang maong mga baligya nga gi-display na unta diha sa Carbon market niadtong Lunes sa gabii hangtud na sa kaadlawon.

Mga delata nga pagkaon ang ilang nasakmit, apil na ang mga star margarine ug uban pa. May pagka tayaon na god ang uban sa mga lata. Aw makaon pa man tingali ang maong mga canned goods apan kuyaw lang nga makadaut.

Dunay mitug-an nga ang mga namaligya sa maong mga hupas nga pagkaon ipanghatud kini og mga sakyanan diha sa Carbon market, dayon mogamit og mga lantay ang mga mamaligya nga kabutangan sa ilang baligya.

Pagbantay mo ha?

* * *

Naleksyon g’yod ang kanhi opisyal sa Bureau of Internal Revenue (BIR) nga wala motug-an nga duna diay siya’y milyon-milyon ka pesos nga kuwarta sa bangko.

Gikwestyon ni Nieto Racho ang hukom sa Visayas Ombudsman nga nagpasaka kaniya og kaso nga falsification of public documents kay gilimod niini ang dakung kwarta nga iyang deposito sa bangko.

Nganong gilimod man ni Nitz? Ang mga kawani sa kagamhanan nga mahadlok mahibaw-an ang ilang kwarta sa bangko kadudahan kaayo nga naghimo kini og binuang.

Aw hinuon, kini si Racho gi-dismiss na man kini sa serbisyo ug gani gitinguha na karon nga sakmiton sa kagamhanan ang iyang deposito sa tulo ka bangko nga misubra sa lima ka milyon ka pesos.

Gihukman sa Supreme Court kaniadto lang Septiyembre 30 nga tukma ang hukom sa Ombudsman dinhi sa Kabisay-an nga angay lang pasakaan og kasong kriminal si Racho, nga usa ka opisyal sa BIR dinhi sa Sugbo.

Mao pay nadungog kining BIR nga daghang mga kawani nga kusog kaayo mangilkil, imo pa man g’yong gilimod ang imong deposito, aw mao na ni ron.

* * *

Ang Coastal Management Board walay hunong sa pagsigi og yawyaw nga limpyohan nila ang atong kabaybayonan ug kasapaan sa mga illegal structures, apan ang problema mao ang kakuwang og political will sa atong mga opisyal.

Sa miaging semana, gitakda na unta nga pang-gub-on ang kabalayan daplin sa Mahiga Creek sa barangay Mabolo, apan wala madayon kay gipahunong ni city administrator Francisco “Bimbo” Fernandez.

Ang rason mao nga mihangyo ang kapitan sa Mabolo nga dili lang panggub-on ang maong mga straktura.

Unya, ang laing illegal structure diha sa baybayon sa Pasil, gipanag-iya ni Konsehal Leon Dakay, ipaguba na g’yod unta apan gitawhan usab ni Mayor Tomas Osmeña ang SPEED nga dili usa idayon kay mihangyo ang tag-iya.

Ang mga tindahan sa tigbaligya og mga imahen sa santos diha sa D. Jakosalem ug Osmeña Boulevard ipaguba na unta sa mayor, apan gipugngan gihapon sa city administrator.

So, mao kini, ang problema magbalik-balik lang sa paghisgot nga puol kaayo paminawon kay ang atong mga opisyal wala may kaisog sa pagpatuman sa tukmang lagda.