Mangayo og P100

Usa ka regular nga sumasakay og V-hire diha sa North Bus Terminal mipadayag sa iyang concern mahitungod sa problema sa mga driver ug van nga nanukad sa pagpamasahero sa maong terminal.

Sa iyang text kanako gamit ang cell. no. 0926-3331833 (Sent: 07:02:40 pm--August 6, 2008), siya mibutyag nga ang mga driver sa V-hire nagbagulbol kay gawas nga nagbayad sila og ticket, anaa pa gyo'y 'lain" nga mangayo og P100 nila.

Sa akong pagsabot, legal ang ilang pagbayad og ticket. Pero kanang gikolektang tag P100 sa usa ka tambok nga lalaki, para asa man kana? Gipasubay ba usab kana sa usa ka balaod, ordinansa o reglamento?

Labing maayo ikapatin-aw kini kay daghan gyud kuno ang mga driver og V-hire nga nagbagulbol mahitungod sa pagpaningil og P100 sa usa ka tambok nga lalaki ngadto kanila.

Angayang pasabton ang mga V-hire drivers kalabot sa kalehitimo sa pagpaningil og P100 ngadto kanila.

Ug kun dili man lehitimo ang maong pagpaningil, nganong gipasagdan man kana nga gipasalir ug magpadayon?

* * *

Laing texter, naggamit sa cell. no. 0919-2112973 mipadangat sab nakog SMS niadtong Agosto 6, 2008 (Sent: 06:05:48 pm).

Ang iyang reklamo mao ang mahitungod sa hotline numbers sa LTO nga dili makontak o walay motubag kun tawgan.

Gihatag sa atong texter ang duha ka hotline numbers apan wala na lang nako ipatik kay basin mosamot og ka-busy kun kalingawan sab og tawag sa mga badlongon nga walay lingaw sa kinabuhi.

Sumala sa atong texter, ang iyang reklamo wala maaksiyoni kay dili makontak o matawgan ang duha ka hotline sa LTO.

Ang akong ikasulti mahitungod niini mao nga kun hangtod karon (sa pagkapatik niining maong lindog) dili pa gihapon makontak o walay motubag sa maong hotlines, angayan na kanang ipasusi kay basin may depekto ang linya.

Pero kun mo-ring kun tawagan, nagpasabot nga dili ang linya maoy depektoso. Unsa kaha?

* * *

(Sumbong ug reklamo? Text sa 0910-8105522)