Mauwaw baya ta uy

Dili ra g’yod lagi kay ako ra ang nakasaway ni Arnel Tancinco tungod sa pagkyogpos ra niya sa problema kabahin sa mga “road obstructions” sama sa mikatap nga mga trisikad diha sa kadalanan.

Tiaw mo, si Atty. Joseph “Dodong” Baduel pwerteng sukoa kay tungod sa pagpasagad ni Arnel direyot siya makadam-ag og trisikad nga dunay sakay nga babaye ug bata didto sa B. Rodriguez.

Nasayod ko nga ang uban sa mga nagbagolbol batok ni Tancinco wala lang mohimo og pormal nga reklamo dili sama ni Baduel nga mipadala g’yod og suwat nga gi-copy furnish pa sa City Hall.

Pagka sayon ra himoan og kampanya anang mga trisikad nga panahon sa gabii, moabot gani diha luyo sa Fuente Osmeña police station.

Isip executive officer sa CITOM, wala ka masayod ani Arnel? Pagkawala g’yod nimo’y pulos uy. Maayo man lang g’yod kas sulti nga ipatuman g’yod nimo ang balaud apan kutob ra man sa ba-ba.

Kun ako pay natumong sa suwat ni Atty. Baduel mauwaw ko uy. Pananglit ako pay dili makatuman sa trabaho nga gisalig nako, mo-resign ko sa kauwaw.

Ngano god tawon nga mopilit ko sa trabaho nga dili makaya.

* * *

Duha na ka babaye ang milaban ni Arnel ug mitawag sa opisina. Nasuko kuno ang maong mga babaye kay nganong gisigihan nako og hisgot ang mga palpak sa ilang idolo.

Ang nanawag kaniadtong Huwebes mora’g tingog og matrona. Aw dili nako ikahibulong kun dunay mosaklolo aning Arnel kay ambongan man siya.

Ang awhag lang nako sa mga molaban nga timbang-timbanga og maayo ang isyu ug sutaa kun ang inyong idolo nakatuman ba sa iyang tahas.

Akong balikon, kun may reklamo kamo sa akong lindog, suwata ug ipadala sa opisina o kaha ipadala sa akong e-mail address ang [email protected].

Kapoy na tingali nga magsigi ta unya og debate sa telepono. Maayo na nga mabasa nato kay matimbang-timbang nato ang inyong mga argumento.

Sama ra god ni Arnel nga manawag nako kun dili na siya makaagwanta, ang iyang mga sulti walay bukog. Moingon ko nga walay bukog kay dili kini makabarug sanglit inighuman sa panaghinabi, dili niya tumanon.

Hatagan ka lang og rason nga “Wala ko’y dukomento ana Bay.” Taphaw nga rason kay sa mga building nga iyang gikasuk-an, sama namo sa Freeman, bisan og wala siya’y gihuptang dukomento wala siya’y pupanagana paghimo’g aksyon.

Usbon nako, kadtong may reklamo, hala, han-aya pag-ayo ang inyong mga argumento kay ako kana nga tubagon.

* * *

Angay lang bitaw nga dakpon ang mga tag-iya og mga drayber sa motorsiklo nga mousab sa disinyo sa ilang sakyanan sama sa pag-ilis sa mga manobela – gikan sa taas ngadto sa mubo.

Mausab man god ang balanse ug posible nga makamugna kini og aksidente. Unya ang uban moilis sa tambutso sa motor aron tuyoon g’yod nga mokusug ug mohagubhob ang tingog nga saba kaayo.

Ang argumento sa uban nga misaway sa lakang sa LTO gihimo nga walay basihanan. Kuno ang maong “requirement” gitumong lang aron makaangkon og dakung halin ang suppliers. Wala kini basihanan.

Ang klaro lang hinoon nga kadtong mga mag-drive og motor nga mag-short pants dili dakpon basta magsapatos lang ug mag-helmet.