Tayo ay biktima ng manipulasyon

Ang kapayapaan kahit saan tingnan

Ay laging mailap dito sa ’ting bayan;

Dahil sa ang gulo ay pandaigdigan

Kaya itong bansa sa gulo ay damay!

Kahit anong gawin ng ating gobyerno

Walang katapusan kaguluhan dito;

Walang kasiyahan ang maraming tao

Kaya tayong lahat ay damay sa gulo!

Mataas ang presyo ng mga bilihin

Kaya itong bansa sakmal ng hilahil;

Ang ating gobyerno kahit anong gawin

Kahit nagsisikap namimilipit din!

Mataas at mahal ang presyo ng langis

At ang presyong ito sabi’y pandaigdig;

Kung kaya ang gulo roon sa Middle East

Ay abot sa bansa at tayo’y ligalig!

Kung pagmamasdan mo’y tahimik ang bayan

Pagka’t walang gyerang kinasasangkutan –—

Pero tayo’y sangkot sa pakikilaban

Sa mga terrorist at mga tulisan!

Kaguluhang ito ay mula sa labas

Na likha ng mga bansang malalakas;

Mayr’ong mga bansang ang gusto’y mangwasak

Sa katabing bansa nang dahil sa armas!

Ngunit itong armas laging may kapalit

Lalo’t ang biktima ay bansang maliit;

Kung ito’y sakop na bibilhan ng langis

Saka kokontrolin presyong pandaigdig!

Ganito ang gulong ating nadarama

Kaya naghihirap itong ating bansa;

Ang katahimikan laging mailap nga –—

Sa manipulasyon na nananalasa!

Kaya tayo ngayon –— ang diwa at puso —–

Sa manipulasyon hindi makalayo;

Nasa palad tayo’t nilalaru-laro —–

Nang maraming pwersang laging nakatago!