Fund raising
"Good AM, Sir. Bahin sa fundraising ang akong pakisayran. Naa man goy manaka sa mga sakyanan ug mangolektag kuwarta para fund raising kuno. Naay papel ilang ipanghatag sa mga pasahero. Pirme na ni kada sakay nakog bus padulong sa norte." -- 0910-3927844 (Sent: 11:22:49 am--July 10, 2008)
Ang pagpahigayon og fund raising dili daotan labina gyod kun tinud-anay nga ang pagtabang sa nanginahanglan maoy tumong.
Ugaling lang kay duna say daghang mga badlongon sa katilingban nga mosakay sa panahon ug ang fund raising gamitong instrumento aron pagpanguwarta sa kaugalingon nilang bolsa.
Labing maayo sutaon kun lehitimo ba ang kapunongan o organisasyon nga nagpasiugda sa fund raising. Kun kredible ba ang nagpasiugda sa pagpangolektag donasyon.
Angay sab sutaon kun para asa ang kolektahong donasyon. Kun alang kang kinsa ang maong fund raising.
Anaa ra ninyo kun mohatag ba kamo o dili nianang manaka sa mga sakyanan aron mangolektag donasyon. Seguroa lang nga dili kamo mailad sa mga badlongon sa katilingban.
* * *
"Good PM, Sir. Diha sa Imus padulong sa Lorega ngitngit kaayo ang dalan kay way suga. Last Sunday gitulis mi sulod sa jeep. Maayo gani kay cellphone lang ang gipanguha." -- 0909-7165018 (Sent: 05:24:32 pm--July 10, 2008)
Ang kangitngit sa usa ka lugar usa sa makapadasig sa mga badlongon sa katilingban sa pagpasalir sa ilang tinonto. Makapabor man god sila sa pagpahigayon sa daotan nilang buhat kun adunay kangiob.
Tungod niini, maayo unta nga masug-an ang mga dapit o kadalanan nga ngitngit, partikular na ang dalan nga gihisgotan sa atong texter. Ang kahayag makatabang sa pag-discourage sa mga badlongon pagpasalir sa ilang tinonto.
* * *
(Sumbong ug reklamo? Text sa 0910-8105522)
- Latest
- Trending
