Kagawasan sa media

Magsugod karong adlawa ang tinuig nga pagsaulog sa mga sakop sa media dinhi sa Sugbo sa Press Freedom Week. Ang maong kasaulogan matag Septembre maglangkob sa usa ka semana nga kalihokan may kalabotan sa pagpalambo sa industriya sa media dinhi sa Sugbo. 

Sayo karong adlawa, sama sa naandan isip pagsugod sa maong selebrasyon, usa ka parada ang ipahigayon gikan sa Cebu Business Park padulong sa Cebu Provincial Capitol.

Sukwahi kini nga rota karon sa naandan nga gikan gayud sa Cebu City Hall grounds. Kini tungod usab sa pagpahigayon sa Alay Lakad sa kagamhanang lokal sa dakbayan nga diin pipila ka libo usab gikan sa nagkalainlaing sektor ang gibanabanang moapil.

Hinuon ang pagpahigayon sa parada karong adlawa tukma kaayo sa proklamasyon sa martial law ni kanhi presidente Ferdinand Marcos 37 na ka tuig ang nakalabay.

Matawag nga makahuloganon kining adlawa pagsugod sa kasaulogan sa Cebu Press Freedom Week gumikan usab kay ato gayud nga mahinumdoman ang pagkahagba sa kagawasan sa pamamahayag human gideklara ang martial law sa administrasyong grabe ang paglapas sa tawhanong katungod.

Isip usa ka martial law baby, gamay ra akong kasinatian sa malapasong rehimeng Marcos. Apan dako na ako og nahinumdoman gikan sa asasinasyon ni Ninoy Aquino hangtud na sa EDSA Revolution.

Gani first year high school na ako niadtong first People Power revolution sa EDSA nga maoy nakapalayas sa diktador gikan sa hawanan sa Malacañang ug pagkalagiw niini ngadto sa Estados Unidos human sa pipila ka adlaw nga demonstrasyon didto sa kaulohan.

Kaniadtong panahon sa martial law, gipatay ni Marcos ang katungod sa katawhan pagkab-ot og balansing inpormasyon gikan sa media. Bisan tuod kun buhi gihapon ang industriya sa pamamahayag niadtong tungora, pakyas kini sa misyon pagdala og balansing inpormasyon ngadto sa katawhan.

Kini tungod usab sa pagkaulipon sa industriya sa rehime’ng puno sa pagyatak sa tawhanong katungod nga wala ni halos ang magpanuko sa pagkondenar. Gigawngan pag-ayo sa diktador ang media aron dili kini makapadayag sa matuod nga panghitabo sa nasud.

Daghang sakop sa industriya ang misuway pagputol sa kadena nga naggapos kanila panahon sa martial law. Apan pipila kanila ang nagtingkagol hinuon sa bilanggoan. Ang uban wala na gani suwerte tungod kay lubnganan gayud ang ilang gipadulngan human nabiktima sa hait nga espada sa diktadorya.

 Hinuon adunay pipila ka sakop sa industriya nga maisugong nakigkumbati sa mga gaway sa diktadorya. Sila mao kadtong maisugong nagdala sa suga sa demokrasya sa nasud.

 Pipila sa mga maisugon nga mga mamahayag panahon sa diktadorya ania nagbasi sa Sugbo. Bisan pa sa pagpanglupig ngadto sa mga mamahayag didto sa kaulohan, padayon gihapon ang pipila dinhi sa Sugbo pagyagyag sa kamatuoran batok sa nayabag nga administrasyon.

 Pabilin silang maisugon sa pagserbisyo sa katawhan bisan pa man sa mga hulga gikan sa malupigong pamunoan. Gani pipila kanila ang aktibo pa karon sa ilang gimbuhaton alang sa pagpalambo sa industriya.

 Ang pagkagawasnon sa mga mamahayag sa Sugbo maoy nagsabwag sa binhi sa tinuig nga selebrasyon sa Cebu Press Freedom Week. Sulod sa 14 na ka tuig, wala gayud mapalta ang lokal nga industriya sa media pagsaulog sa pagkagawasnon sa mga sakop niini.

 Gani ang Sugbu lamang sa tibuok nasud ang adunay tinuig nga kasaulogan sa pagkagawasnon sa pamahayag. Ug dako kini nga garbo alang kanatong ania sa industriya sa Sugbu.

 Nagpasabot lamang kini sa kadako sa papel nga atong gihuptan alang sa pagpatunhay sa demokrasya ug kagawasan sa pamamahayag sa nasud.  

* * *

Ipadala inyong reaksiyon sa [email protected]