'Kabanay unlimited'

Mas misamot pa ang dugay nang bangi sa mga opisyal sa dakbayan sa Mandaue human ang mga sakop sa konseho nga gidominar sa oposisyon mipagawas sa listahan sa mga paryente ug kabanay ni Mayor Jonas Cortes nga nagserbisyo sa dakbayan.

Si Bise Mayor Carlo Pontico Fortuna nga maoy nangulo sa oposisyon sa Mandaue sa pagkakaron miingon nga ang maong mga kabanay ni Cortes maoy naghari sa nagkadaiyang departamento sa dakbayan.

Gihulagway ni Fortuna nga mas gamhanan pa gani ang maong mga kabanay sa mayor kay sa mga opisyal gyud sa Mandaue.

Si Fortuna miingon nga nabalaka siya sa maong sitwasyon tungod kay samtang naghari ang maong mga kabanay sa mayor dili sila “accountable officials” sanglit wa man sila’y appointment.

Buot ipasabot nga kun dunay bulilyaso sa ilang pagpanghilabot sa mga kalihukan sa dakbayan dili sila mamahimong gukdon o ikiha sa Ombudsman. Lakip sa listahan nga gibulgar nilang Fortuna mao sila si Zoilo Cortes, Lily Manding Cortes, Editha Cortes, Victor Cortes, Demetrio Cortes, Jr., Hermie Cortes, Jimmy Vasquez, Edmund Sanchez, Eutiquio Sanchez, Briccio Boholst, Hidelito Pascual, Antonio Sanchez ug Omar Redula.

Si Mayor Cortes nanghimakak nga ang iyang mga kabanay nanghilabot sa kalihukan diha sa Mandaue. Sumala pa niya nga nagsilbe lang sila nga miyembro sa council of elders.

Gisumbalik ni Cortes ang mga sakop sa konseho nga maoy mabasol niini tungod kay gibabagan niini ang iyang tinguha nga magkuha og mga consultants. Agi og bawos sa pagbulgar ni Fortuna sa iyang mga kabanay iya pud nga gipagawas ang listahan sa mga miyembro sa pamilya ni kanhi Mayor Thadeo Ouano nga nagtrabaho kaniadto sa Mandaue.

Gihinganlan pud ni Cortes sila si Cheryl Ouano, Linda Ouano, Lollipop Ouano, Joy Ouano, Alfredo Ouano ug daghan pa.

Sumala pa ni Cortes nga daghan pud nga pamilya ni Ouano ang nagserbisyo kaniadto sa Mandaue apan wa kwestiyona ni Fortuna. Tinuod nga way nawong si Fortuna nga mokuwestiyon sa “kabanay unlimited” ni Cortes sa pagkakaron apan wa sab ni nagpasabot nga sayop ang iyang gihimo.

Kun nasayop man si Fortuna nganong karon lang siya nangusog pagkuwestiyon sa mga kabanay sa mayor nga nagtrabaho sa Mandaue, angayang hinumduman ni Cortes nga kabahin sab siya sa maong sayop.

Di siya kapanghunaw ug si Fortuna maoy dakdakan sa tanang sayop tungod kay kabahin siya niini. Nalimot siguro si Cortes nga konsehal sab siya atol sa kanhi administrasyon busa mas maayo sab tingali nga iya sab nga tubagon nganong wa man siya moreklamo niadtong higayona?

Di maayo nga inay iisplikar ang papel sa iyang mga kabanay diha sa Mandaue mangita hinuon siya og unsay ibawos nga pasangil. Gawas pa nganong ang mga Ouano man maoy iyang gipuntariya nga si Fortuna man maoy nangatake niya?

Tinuod di santos si kanhi Mayor Ouano tungod kay kun maghisgot ta og pasangil sa korupsiyon wa na tingali kalupig pa sa iyang administrasyon, apan di sab makiangayon alang niya ug sa iyang pamilya nga maangin sa unsa man nga away nila ni Cortes ug Fortuna.

Kini tungod kay nagpakahilom na ang mga Ouano ug wa gyud gani ni mag-apil-apil sa mga pasangil bisan og ang ilang mga supporters kaniadto gipangkulban sa kaldero.

E-mail:   [email protected]