Kapitan sa M/V Princess of the Stars

Giputos og puti nga mantil ug silyado ang lungon nga may gipatung nga hulagway sa kapitan sa barkong m/v Princess of the Stars ang senaryo sa usa sa mga chapel sa Sacred Heart Church. Tak-om ang baba sa mga tawo nga nagbilar sa maong patay sa pangutana kung sa kang Capt. Florencio Marimon Sr. ba ang patay’ng lawas nga gihaya. Apan pipila ka minute sa wa’ pa magda’ og camera ug microphone ang reporter sa ABS-CBN nga si Carmi Cavanlit, bukas nga gi-angkon sa usa sa mga tawo didto sa lamay nga si Capt. Marimon ang ilang gilamayan. Tungod niini, migawas ang mga pagduda nga gitago sa pamilya ug mga higala ang haya sa kapitan ug buot nilang ilubong ang patay’ng lawas sa hilom nga paagi.

Apan di’ pwede itago o ihilom ang kompirmasyon nga patay na ang kapitan sa nalunod nga barko tungod sa kadaghan sa mga isyung naglambigit sa usa sa labing dakong trahedya sa kadagatan nga natala. Gani sa imbestigasyon sa Board of Marine Inquiry, gibuhos nila ang pasangil sa kapitan sa barko nga maoy sad-an nganong nisangpot sa pagkalunod ang barko. Angayan tan-awon nga su’d sa kapin duha ka buwan human ang trahedya, nag-unang pangutana kung asa na ang kapitan ug tinuod bang gitaguan siya sa taga Sulpicio aron di’ mahibaw-an unsay nahitabo sa wa’ pa motakilid hangtud nga malunod ang barko. Ug karong patay na ang kapitan, daghang mga pangutana ang posibleng di’ na matubag.

• Tinuod ba nga ang taga Sulpicio ang nagmando sa kapitan sa pagpalarga bisan sa kusog nga bagyong gipaabot nga mo-igo sa rota sa m/v Princess of the Stars?

• Tinuod bang nihatag og pasidaan ang mga taga Philippine Coast Guard nga di’ mobiya tungod sa delikadong kahimtang sa panahon

• Tinuod bang napawong ang makina wa’ pa motakilid ang barko dayon pagtikya-ob niini?

• Tinuod bang dautan ang makina ug nagkalisang ang mga tripulante sa wa’ pa mahitabo ang pagkalunod sa barko?

• Tinuod bang gipugos ni Capt. Marimon ang pagpadayon sa biyahe bisan kung delikado na ang kahimtang tungod sa pagkuso-kuso sa dagkong bawod ug paghapak sa kusog nga hangin?

• Tinuod bang gimanduan sa kapitan ang tanang mga pasahero sa pag-ambak gikan sa barko ug pagsigurong nagsul-ob pg life jacket ang tanang mga pasahero sa wa’ siya moambak?

Karon, magpabiling pangutana ang daghang pangutana tungod sa kamatayon sa kapitan sa barko. Apan ang di’ nako masabtan, nganong kinahanglan nga itago sa pamilya ang patay’ng lawas ni Capt. Marimon nga wa’ namay mahimo ang mga kabanay nga nipasangil sa kapitan. Ang di’ nako masabtan nganong moabot sa pagpamakak ang pipila ka mga kabanay ug mga taga simbahan aron lang pagtabon sa kamatuoran nga iya sa kapitan sa barko ang patay’ng lawas.

Maisip nga lahi ang lawas ni kapitan sa gatosan ka mga lawas nga nakit-an ug gipa-ubos sa DNA testing tungod sa gihuptan nga responsibilidad ini sa wa’ pa ang trahedya. Apan karong patay na si Marimon, di’ pa ba ni igo aron ipadangat sa mga kabanay sa mga pasahero nga wa’ nay kapa-ingnan ang daghang mga pangutana ug pasangil tungod kay patay na ang kapitan. Wa’ ba mahibaw ang pamilya nga karong nahibaw-an nga nakalas diay si Marimon ug apil sa barko nga iyang gipanguluhan. Girespeto nato ang desisyon sa pamilya nga kung mahimo itago ang pag-claim nila sa patay’ng lawas sa kapitan hangtud na sa paglubong niini. Apan mas maayong tan-awon ug hinuklogan sa pamilya nga di’ ordinaryong pasahero sa barko si Marimon. Si Marimon ang kapitan sa barko ug ang pagpangita sa iyaha maoy nahimong misyon sa mga tawo nga naghupot sa imbestigasyon sa pagkalunod sa barko. Ug karong nahibaw-an nang patay ang kapitan, di’ lang ang iyang kalag ang nahimutang na apan mismong iyang pamilyang gipangulbaan tungod sa kalagot sa pamilya sa mga pasahero, ang mabutang na sab sa kalinaw ang pagpuyo. Maisip nga pait ang trahedya labi na sa pamilya Marimon kinsa maoy naputos sa mga pasangin. Apan mas maayong tan-awon sa pamilya nga uban sa pagka-kalas sa ilang mahal sa kinabuhi, mao ang kapahulayang dayon sa iyang kalag ug ang pagtapos sa kalagot, kahi-ubos ug pasangil sa mga tawo nga nasubo ug nagbangutan sa trahedya.