Magic Imbudo

Nangandoy kog “Magic Imbudo.” Nga maoy sulbad sa kagutom. Mao say sulbad sa mga sakit tungod sa sobrang pagkaon o sayop nga pagkaon. Mahimong mao pa gani ang motapak sa higanteng kang-a tali sa mga kabos ug mga adunahan.

Pangandoy ra bitaw ni. Ang “Magic Imbudo” mahimong mosangpot sa kalibotanong kalinaw. Kay maoy motino sa makiangayong pag-apud-apod sa katigayonan sa kalibotan-aron di na mag-awas ang mga pagkaon sa industriyalisadong mga nasud ug di na gutman ang kabos nga kanasuran. Sa way tihik-tihik, ang “Magic Imbudo” mahimong mosangpot sa tinuod nga kalipay. Sa gisaad nga langit dinhi sa yuta.

Ang “Magic Imbudo” maoy tubag sa dakong eskandalo sa atong panahon: Sa usa ka bahin, ang mga adunahan maglisod unsaon paghipos ang ilang sobrang pagkaon; samtang sa pikas nga bahin, ang mga kabos mangukay sa mga basurahan aron pagpangita og pagkaon. Ang “Magic Imbudo” maoy mokalis sa sobrang pagkaon sa harianong mga talad ug luhong mga kan-anan ug mopadailos nila ngadto sa mga pinuy-anan kansang mga tagbalay nag-memorya lag pamahaw, nasag-ulo na lang ang paniudto ug aslom ang damgo kay natug nga way panihapon.

Ang “Magic Imbudo” di lang alang sa mga kabos kun dili makaayo sab sa mga adunahan. Mosakmit ni sa mga pagkaon nga puno sa tambok sa di pa mahungit sa mga may hypertension ug masakitong kasingkasing, ingon man sa mga putaheng parat kaayo gikan sa mga masakiton og rinyon.

Ang “Magic Imbudo” makatabang sab sa adunahang mga nasud. Inay ipanglabay sa dagat ang sobra nilang mga produkto sa kahadlok nga motidlom ang kalibotanong presyo tungod sa nagsobrang suplay, ang “Magic Imbudo” mopabaha nila ngadto sa labing kabos nga kanasuran, nga di nang kaapektar sa presyo sa merkado makaluwas pa gyod sa mga gipanggutom ug masakiton.

Ang “Magic Imbudo” maoy mougkat sa gamot nga hinungdan sa kalibotanong katimawa: Di ang kakuwang sa pagkaon, ni kataspokan sa mga kabos, kun dili ang pagkatingob sa labing dakong bahin sa katigayonan sa pipila ug nag-ilog intawon sa mumho ang mayoriya.

Ang “Magic Imbudo” mahimong nganlan og “hyperwage.” Mahimo sang tawgon nga “rebolusyon.” Bisan unsa pay ngan, ang tumong managsama: Ang paghatag sa kinabag-an sa ilang makiangayong bahin sa katigayonan. Nga di mahitabo bisan unsaon pagkugi sa kinabag-an.

Mapatigbabaw lang ang kaangayan kun ang mga adunahan mopitol sa ilang kahakog, mokonsumo lang kutob sa ilang gikinahanglan ug makigsawo na sa ilang sobra ngadto sa labing daghan. Duna silay duha ka kapilian paghimo ini: Ang pagtahan sa sobra nilang katigayonan sa malinawong paagi; o sakmiton ni gikan nila pinaagi sa puwersa.

Ang “Magic Imbudo” di hingpit nga malinawon. Kay di ni kabalibaran hangtod sa kahangtoran. Busa, kun suklan, mahimo sab ning duguon.