"Good day, Sir. Moreklamo lang ko batok sa usa ka taxi driver kay hapit ko niya maligsi. Gibugalbugalan ra ko sa driver ug nagsinggit-singgit og bastos nga pulong. Gusto nako nga madisiplina ang maong driver." -- 0910-5613524 (Sent: 05:18:55pm--June 30, 2008)
Kun gusto kang madisiplina ang maong taxi driver, reklamo ngadto sa tag-iya niini. Maayo kay nakuha sab nimo ang plate number ug ngalan sa taxi nga gimaneho sa maong driver, dili ka maglisod sa pagpaabot sa imong complaint ngadto sa tag-iya niini.
Mas maayo sab nga i-refer mo kini ngadto sa buhatan sa LTO o ba kaha magpa-blotter ka sa buhatan sa kapolisan aron matawagan ang atensiyon sa taxi driver nga gusto nimong madisiplina.
* * *
"Nganong daghan man kaayong maningil sa Carbon? Bisan gamay ra ang tinda paninglan gyud. Kun mohangyo dili mosugot. Masuko hinuon." -- 0910-3561578 (Sent: 07:07:44pm--June 30, 2008)
Sa atong pagpaninda, diyotay man o daghan ang atong tinda, kinahanglang mosunod ug motuman kita sa mga sumbanan ug regulasyon nga gipatuman sa usa ka merkado, ingon pananglit sa Carbon.
Usa na niini ang pagbayad sa balayranan nga gipatuman sa management sa merkado nga gipasikad sa usa ka reglamento, ordinansa o balaod. Basta legal lang ang pagpaningil og balayranan angay kitang motuman niini.
Seguroa lang nga mahatagan kag resibo o ba kaha cash ticket gikan sa nangolekta. Mas maayo sab nga maneguro ka nga ang imong gibayad dili mahipunta ngadto sa pribadong bolsa.
* * *
Sa laing bahin, awhagon sab nako ang mga kolektor sa merkado nga kun dunay mohangyo ninyo, ayaw lang kasuko. Pasabta hinuon ninyo ang manindahay nganong gipaninglan silag bayad sa ilang pagpaninda diha sa merkado. Dili kay masuko o ba kaha mangasaba mo kay wala na man sab kana mabutang sa hustong lugar.
Pagsabot-sabot lang god mo aron walay gubot! Kun dili ta magkasinabtanay bahin sa gagmay nga mga butang, unsa na kaha sa dinagko? Kun ingon kita niini kanunay, dili gyud makabaton og hingpit nga kalinaw ang atong nasud.
* * *
(Sumbong ug reklamo? Text sa 0910-8105522)