Sagad sa mga labaw’ng opisyal nga magdumala’g ahensya o kaha opisina sa kagamhanan, mopirma ra g’yod sa mga dukomento nga dili na mobasa pa sa mga supporting documents sa papeles o tseke nga ilang gipirmahan.
Mao kini ang rason nga sagad maapil sila kun dunay mga binuang nga binuhatan sa ilang mga sinaligan.
Gipasabot ko ni LTO-8 regional director Alex Leyson nga kun nakapirma man siya og dukomento o tseke nga nalambigit og kwestyonableng transaksyon nagumikan kini kay subra ang iyang pagsalig sa iyang staff.
Misalig siya nga ang financial transaction nga giduso sa iyang opisina aron papirmahan gihan-ay g’yod pag-ayo nga walay binuang kay gihikay man kini sa ilang finance ug disbursing officer dihang dinhi pa siya madistino sa Sugbo.
Apan pastilan. Awhagon nako si Marissa Beriño ang kanhi disbursing officer sa LTO diha sa Natalio Bacalso Avenue nga pakita og pasabta ang katawhan mahitungod niining maong isyu.
Kun dili tinuod nga nakabulsa ka og minilyon ka pesos gikan sa kwarta sa kagamhanan, tubaga kining maong mga isyu. Husto usab ang mga state auditors nga maayong pugngan si Beriño nga makalarga sa laing nasud.
Pananglit tinuod man nga nangawkaw og kwarta sa kagamhanan si Beriño, maayo lang nga pakungon ang ilang ulo ni Rosalina Badana, kadtong kanhi paymaster sa dakbayan nga nakabulsa usab og P18 milyones.
Pagbaton usab mo intawon og kauwaw uy. Buyno, sa bahin ni Beriño wala pa kaayo ko motoo nga siya sad-an gawas lang kun motago siya sa giatubang niyang kaso sa Ombudsman.
Apan si Badana, “999 porsiento” nga mitoo ko kay gikan adtong 2001 wala na g’yod siya magpakita. Pakauwaw ka lang sa imong mga anak ug kabanayan.
Sayop lang g’yod sab sa mga opisyal nga moderitso lang og pirma sa mahinungdanong dukomento nga maglambigit og kwarta. Kun ako ang anaa sa ilang dapit dili g’yod kini nako himuon.
Ambot, dili tingali kamo motoo apan ingnon ko kamo nga ang baga kaayong mga dukomento nga magsuporta sa mga isyu nga gituki sa konseho sa dakbayan, ako g’yong basahon, ilabi na kun maglambigit og kwarta.
Ingon g’yod unta niini ang buhaton sa mga opisyal. Ayaw ninyo’g irason nga kapoyan na kamo nga mobasa kay baga kaayo ang maong mga dukomento. Ngano bitaw nga “mi-enter mo.?”
Sama ra bitaw namo nga mga reporters nga bisan asa kami idistino ug sugoon pagpasuwat sa mga isyu nga lisud kaayo sabton, mag-antos g’yod mi pagbasa ug paghimo’g research aron masabtan ang maong isyu.
Maayo unta og makakuha mo og pagtulon-an nga mga tapolan nga mga opisyal nga moderitso lang og pirma. Mora man lang mo adtong presidente nga diritso lang og pirma bisan unsay itunol kaniya aron papirmahan.
* * *
Dili gihapon angay’ng ikalipay ang laing pagkunhod og usa ka pesos sa kantidad sa gasolina ug krudo kagahapon.
Mahal pa gihapon ang P55.76 nga litro sa krudo. Tiaw mo, dili man gani ko hinuroy apan makapanglingo-lingo tawon ko kay mogasto ko og P4,000 sa diesel alang sa akong sakyanan matag buwan.
Ambot, bisan ibalik na lang unta kadtong presyo nga tag P27 pa ang matag litro sa krudo. Paminaw nako mora’g imposible na kaayo kadtong mobalik pa. Igo na lang kita sa paghandom.