Palukaton

"Sir sa Lutac, Naga City naay nagbaligya og NFA rice but palukaton pa ka og cedula nga tag P17. Unya tag P18.25 ang kilo pero kun P100.00 ang imong ibayad dili ka suklian." -- 0919-7953961 (Sent: 10:17:55am--July 4, 2008)

Dili man daotan ang paglukat og cedula. Sa tinuod lang, kitang tanan angay gyod dunay cedula kay magamit man kini nato sa lainlaing transaksiyon. Timaan sab kini nga nagtuman ta sa gimbut-an sa balaod.

Bahin nianang pagpalukat og cedula sa gustong mopalit og NFA rice diha sa Lutac, Naga City, mangayo tag katin-awan sa retailer mahitungod niini. Maayo unta kun nakabasa sila niini.

Wala koy nakitang iregularidad niini pero mas maayong makapasabot ang retailer sa NFA rice sa Lutac sa ilang habig aron makasabot sab kadtong mga pumapalit.

* * *

"Naay bag-ong modus operandi karon.Usa ka babaye nga mubo og buhok nag-edad og 46 to 49 magdala og bata. Mangayo og P6.00 or P12.00 para kuno iplite. Pero sige na kana niyang buhaton. Nakit-an nako sila sa gawas sa parkingan sa usa ka mall sa reclamation area ug sa Lahug. Nakahatag na ko ana niya once before kay wa pa ko kahibalo pero ganiha nakita na pod nako siya sa gawas sa mall. Iya na pod kong gipangayoan og kuwarta. Akong giingnan nga ilad man nang imo. Gitubag lang ko niya og 'sige lang god!' Pagbantay mo ini niya." -- 0929-5406388 (Sent: 03:43:23 pm--July 4, 2008)

Hinaot unta nga pinaagi ning text sa atong texter, makabantay ang atong kaigsuonan bahin sa modus operandi nianang usa ka babayeng maingon tang "nanguwarta" pinaagi sa yanong   pagpangilad.

* * *

Mohangyo ko sa gustong mosumbong dinhi sa atong lindog nga palihog ayaw i-abbreviated ang inyong text aron masabtan sa dakong kasayon ang inyong mga detalye ug sa ingon makapangomentaryo sab ta sa tukmang paagi. Daghang salamat.

(Sumbong ug reklamo? Text sa 0910-8105522)