Ang naggamit sa cellphone number 0919-8085107 mi-text nako niadtong Mayo 28, 2008 (Sent: 09:35:42 pm) aron pagtaho bahin sa usa ka polis nga na-assign diha sa Jagobiao, Mandaue City nga iyang gihulagway nga "hambogero" kaayo.
* * *
Sumala sa atong texter, kining maong polis may kauban sab nga tanod. Magsige (kuno) og panion ning maong polis sa mga batan-on.
Unsa may sala sa mga batan-on nga tionan mao ning maong polis. Kun tinuod kini, tulibagbag kaayong paminawon labina gyud kun ang mga batan-on nga gitionan walay nahimong kalapasan.
Angay pahinumdoman ang maong polis nga wala siya isyuhig armas aron manion sa dakong kasayon ug walay lig-ong sukaranan sa pagbuhat sa ingon ngadto ni bisan kinsang tawo.
Hinayhinay lang, Sir!
* * *
Kanunay kong makadawat og reklamo bahin sa mga tindahan nga lakip ang plastik nga sudlan sa atong pinalit pabayran og apil sa mga produkto nga atong gipalit.
Sa kadugayan ako na gyod mismo ang nakasinati niini. Diri sa lungsod sa Ubay, naay mga tindahan nga naghimog ingon niini. Nipalit kog bugas. Sa ubang tindahan, tag P33 ang kilo. Pero sa gipalitan nako nga tindahan, tag P34 ang iyang presyo sa samang klase sa bugas.
Ang katarongan sa tigbaligya, maong taas ang iyang presyo kay giapil niyag kuwenta ang plastik nga sudlan sa bugas. Tag P1.00 diay ang iyang plastik! Kadakong binuang ang gihimo sa maong tindero!
Kini pagpamatuod na sab nga duna gyoy daghang mga negosyante nga wala motahod sa Consumer Protection Act. Ug naa sad lagi ni sa Ubay, Bohol.
* * *
Mohangyo ko sa buot motampo ning atong lindog nga taronga ninyo ang inyong detalye sa sumbong aron ato kining makomentaryhohan. Ayaw mo padala sa inyong kalagot samtang nagpadayag sa inyong sumbong. Importante ang detalye sa hitabo.
Labing maayo nga dili abbreviated ang text aron masabtan kini sa dakong kasayon. Salamat.
* * *
(Sumbong ug reklamo? Text sa 0910-8105522)