Kay gisulay gusto nang mamatay

Usa ka tawo ang niduol kanako alang sa usa ka pagkonsulta. Naproblema siya pag-ayo. Siya nagkanayon: “Abi nimo padre nakahunahuna ko nga magpakamatay na lang aron matibway ang tanan!” Ako siyang gisumbalik og pangutana: “Kun magpakamatay ka, mahatagan og kasulbaran ang imong problema? Mas problema pa hinuon dili ba? Mag-unsa na lang ang imong pamilya, bisan gani ang mamatay karon problema naman kaayo labina kun wala tay sapi di ba?” Tingali nasobrahan lang tingali ang akong reaksiyon. Akong nakita nga wala ako magagikan sa pagbati kondili sa akong hunahuna. Apan salamat sa Dios kay ang maong tawo buhi gihapon hangtod karon ug nakaamgo nga kabahin na diay sa kinabuhi ang mga pagsulay. Walay tawo nga wala moagi og kalisud.

Ang mga tinun-an sa atong ebanghelyo karon ang nakasinati og dili tiaw nga kabalaka sa dihang sila gikuso-kuso sa dagkong mga balod. Pun-an pa nga nakita nila ang atong Ginoo nga naglakaw sa tubig. Dili na kahadlok ang ilang nasinati kondili kalisang. Si Pedro sa laing bahin, ang nangita og pagmatuod kun ang Ginoo ba gayud kadto busa nangahas siya sa paglakaw sa tubig apan naunlod lang tungod sa dagkong mga balod.

Ang komentaryo sa atong Ginoo ngadto kaniya: “Pagkadiyotay sa imong Pagtuo!

Sa atong kasamtangang kahimtang usahay lisod kaayo ang paghiusa sa Pagtuo ug sa Reyalidad. Maglisud na kita sa pagtan-aw sa bulok ug kahulogan kun nganong nia pa ta dinhi ning kalibotana. Labaw na nga pait ang pagpangapkap sa kasandigan labina kun maghisgot na kita og SURVIVAL!” Dili paigo nga magpunay lang og ampo ug dili usab haom nga ihawa ang espirituhanong elemento sa atong pakigbisog.

Gikinahanglan nato ang pagtuo nga makalingkawas kita sa atong mga pagsulay. Kinahanglan nato ang pagtuo sa pag-angkon sa atong kakulangan, labaw na nga kinahanglan nato ang pagtuo diha sa pagtan-aw sa rason luyo sa atong mga kalisdanan. Mao kini ang nakapahimo sa atong kinabuhi nga misteryoso. Dili tungod kay maglisud kita sa pagpangita sa tubag sa atong mga pangutana kondili tungod ning maong mga abnormal nga panghitabo makakita kita sa kahayag taliwala sa dulom nga kalibutan.